കോട്ടയം : ജില്ലയിൽ 54 പേർക്ക് കൂടി കൊവിഡ് സ്ഥിരീകരിച്ചതിൽ 41 പേർക്കും രോഗം ബാധിച്ചത് സമ്പർക്കത്തിലൂടെ. ജില്ലയിലെ ആദ്യ കൊവിഡ് മരണവും ഇന്നലെ റിപ്പോർട്ട് ചെയ്തു. ചുങ്കം സ്വദേശി ഔസേഫ് ജോർജ് (83) ആണ് മരിച്ചത്. 12 പേർ മറ്റു സംസ്ഥാനങ്ങളിൽ നിന്നും ഒരാൾ വിദേശത്ത് നിന്നും വന്നതാണ്.

ബംഗളൂരുവിൽ നിന്ന് എത്തി ഹോം ക്വാറന്റൈനിൽ കഴിഞ്ഞിരുന്ന ടി.വി.പുരത്തെ ഒരു കുടുംബത്തിലെ രണ്ടുവയസുള്ള കുട്ടി ഉൾപ്പെടെ അഞ്ച് പേർ രോഗം ബാധിച്ചവരിൽ ഉൾപ്പെടുന്നു.

കുമരകം സൗത്തിൽ നേരത്തെ രോഗം സ്ഥിരീകരിച്ചയാളുടെ ഭാര്യയ്ക്കും മകൾക്കും മാതാപിതാക്കൾക്കും സമ്പർക്കം മുഖേന രോഗം ബാധിച്ചു. മാടപ്പള്ളി തെങ്ങണയിലെ ഒരു കുടുംബത്തിലെ രണ്ടു പേരും, ചീരംചിറയിൽ നേരത്തെ രോഗം സ്ഥിരീകരിച്ചയാളുടെ സമ്പർക്ക പട്ടികയിൽ ഉണ്ടായിരുന്ന എഴുപതുകാരനും ഭാര്യയും, മൂലവട്ടത്ത് സമ്പർക്ക പട്ടികയിലുണ്ടായിരുന്ന 61 കാരനും ബന്ധുവായ യുവാവും രോഗബാധിതരിൽ ഉൾപ്പെടുന്നു.

ഇന്നലെ രോഗമുക്തി നേടിയവർ : 38

നിലവിൽ ചികിത്സയിലുള്ളത് : 413

ഇതുവരെ രോഗം ബാധിച്ചത് : 868

സമ്പർക്ക രോഗബാധ കൂടുതൽ കോട്ടയം മുനിസിപ്പാലിറ്റിയിൽ

കോട്ടയം മുനിസിപ്പാലിറ്റിയിലാണ് സമ്പർക്കം മുഖേനയുള്ള രോഗബാധ ഏറ്റവും കൂടുതൽ സ്ഥിരീകരിച്ചത് 11 പേർ. കുമരകം : നാല്, മാടപ്പള്ളി, തൃക്കൊടിത്താനം, പനച്ചിക്കാട് : മൂന്നു വീതം, അതിരമ്പുഴ, അയ്മനം, ഏറ്റുമാനൂർ, വാഴപ്പള്ളി, നീണ്ടൂർ, തലയാഴം, വൈക്കം മുനിസിപ്പാലിറ്റി : രണ്ടു വീതം, എരുമേലി, മറവന്തുരുത്ത്, ഉദയനാപുരം : 1 എന്നിങ്ങനെയാണ് മറ്റുള്ളവർ.

വിവിധ കേന്ദ്രങ്ങളിൽ ചികിത്സയിൽ കഴിയുന്നവർ

സി.എഫ്.എൽ.ടി.സികൾ : മുട്ടമ്പലം : 85, നാട്ടകം : 70, കുറിച്ചി : 56, അകലക്കുന്നം : 42, പാലാ : 48, ഏറ്റുമാനൂർ : 50.

ആശുപത്രികൾ : മെഡിക്കൽ കോളേജ് കോട്ടയം : 35, ജനറൽ ആശുപത്രി കോട്ടയം : 17, കോട്ടയത്തെ സ്വകാര്യ ആശുപത്രി : 1, എറണാകുളം മെഡിക്കൽ കോളേജ് ആശുപത്രി : 3, തിരുവനന്തപുരം മെഡിക്കൽ കോളേജ് ആശുപത്രി : 4, ഇടുക്കി മെഡിക്കൽ കോളേജ് ആശുപത്രി : 2.