കോട്ടയം : കൊവിഡ് പ്രതിരോധ മാര്‍ഗനിര്‍ദേശങ്ങള്‍ ലംഘിച്ച 59 പേർക്കെതിരെ ജില്ലയിൽ കേസെടുത്തു. പൊതു സ്ഥലങ്ങളില്‍ മാസ്‌ക്ക് ധരിക്കാതിരുന്നവര്‍ക്കും സാമൂഹിക അകലം പാലിക്കാതിരുന്നവര്‍ക്കും പൊതു സ്ഥലത്ത് തുപ്പിയവര്‍ക്കുമെതിരെയാണ് നടപടി. ഈ മൂന്നു നിയമലംഘനങ്ങള്‍ക്കും 200 രൂപ വീതമാണ് പിഴ. സന്ദര്‍ശകരുടെ പേരുവിവരങ്ങളും മൊബൈല്‍ നമ്പരും രേഖപ്പെടുത്തി സൂക്ഷിക്കാത്ത വ്യാപാര സ്ഥാപനങ്ങള്‍ക്ക് താക്കീത് നല്‍കി. നിലവിലെ സര്‍ക്കാര്‍ നിര്‍ദേശം ലംഘിച്ച് പൊതു, സ്വകാര്യ ഗതാഗതം നടത്തിയാല്‍ രണ്ടായിരം രൂപയും നിയമവിരുദ്ധമായി ഇതര സംസ്ഥാന ഗതാഗതം നടത്തിയാല്‍ അയ്യായിരം രൂപയും പിഴ ഈടാക്കും. വരും ദിവസങ്ങളില്‍ ജില്ലയിലെ എല്ലാ കേന്ദ്രങ്ങളിലും പരിശോധന തുടരുമെന്ന് ജില്ലാ കളക്ടര്‍ അറിയിച്ചു.