ന്യൂഡൽഹി:കൊവിഡ്-19 പ്രതിസന്ധിയിൽ ഏര്‍പ്പെടുത്തിയ ഇളവുകള്‍ ബാങ്കുകള്‍ പുനഃസ്ഥാപിക്കുകയാണ്. ജൂലായ് മുതല്‍ നിരവധി സാമ്പത്തിക മാറ്റങ്ങളാണ് ബാങ്കിംഗ് മേഖലയില്‍ പ്രാബല്യത്തില്‍ വരുന്നത്. പല ഇളവുകള്‍ അവസാനിക്കുകയും കൂടുതല്‍ മാറ്റങ്ങള്‍ നിലവില്‍ വരുകയും ചെയ്യും. ബാങ്കിംഗ് മേഖലയില്‍ പ്രാബല്യത്തില്‍ വരുന്ന സാമ്പത്തിക മാറ്റങ്ങള്‍ അറിയാം.
എടിഎമ്മില്‍നിന്ന് പണം പിന്‍വലിക്കുന്നതിന് ചാര്‍ജ് നല്‍കേണ്ടി വരും
കൊവിഡ് -19 നെ തുടർന്ന് എടിഎം ഇടപാട് നിരക്കുകളില്‍ നല്‍കിയ ഇളവുകള്‍ ബാങ്കുകള്‍ പിന്‍വലിക്കും. എടിഎമ്മില്‍നിന്ന് പണം പിന്‍വലിക്കുന്നതിന് ഈടാക്കിയിരുന്ന നിശ്ചിത നിരക്ക് വീണ്ടും ഈടാക്കി തുടങ്ങും. ജൂണ്‍ 30 വരെ മൂന്ന് മാസത്തേയ്ക്കായിരുന്നു നിരക്കുകള്‍ ഒഴിവാക്കിയിരുന്നത്. നിശ്ചിത സൗജന്യ ഇടപാടുകളില്‍ കൂടുതല്‍ നടത്തിയാല്‍ ഓരോന്നിനും 20 രൂപ സേവന നിരക്കും ജിഎസ്ടിയും ഈടാക്കും. എടിഎമ്മില്‍നിന്ന് പണം പിന്‍വലിക്കലിക്കുന്നതിനാണ് ഇത് ബാധകമാകുക.
അക്കൗണ്ടിലെ മിനിമം തുകയ്ക്ക് ചാര്‍ജ്
എടിഎം ഇടപാടുകള്‍ക്ക് ഇളവുകള്‍ നല്‍കിയതുപോലെ ബാങ്ക് അക്കൗണ്ടുകളിലെ മിനിമം തുകയ്ക്കും ഡിജിറ്റല്‍ വ്യാപാരത്തിനും പണമിടപാടുകള്‍ക്കും സര്‍ക്കാര്‍ ഇളവുകള്‍ ഏര്‍പ്പെടുത്തിയിരുന്നു. ഈ ഇളവുകളും പുനഃസ്ഥാപിക്കും. വിവിധ ബാങ്കുകള്‍ വ്യത്യസ്ത നിരക്കുകളാണ് ഈടാക്കുന്നത്. അതുകൊണ്ടുതന്നെ ഉപഭോക്താക്കള്‍ അതത് ബാങ്കുമായി ബന്ധപ്പെട്ട് ഇക്കാര്യത്തില്‍ വ്യക്തത വരുത്തേണ്ടതാണ്. ബാങ്ക് അക്കൗണ്ടില്‍ മിനിമം തുക ഇല്ലെങ്കില്‍ പിഴയിടാക്കുകയും ചെയ്യും. 5,000 മുതല്‍ 10,000 രൂപ വരെയോ അതില്‍ കൂടുതലോ ആയിരിക്കാം അക്കൗണ്ടില്‍ വേണ്ട മിനിമം തുക.
മ്യൂച്വല്‍ ഫണ്ട് നിക്ഷേപങ്ങള്‍ക്ക് സ്റ്റാമ്പ് ഡ്യൂട്ടി
മ്യൂച്വല്‍ ഫണ്ടില്‍ നിക്ഷേപം നടത്തുന്നതിന് സ്റ്റാമ്പ് ഡ്യൂട്ടി നല്‍കണം.വ്യവസ്ഥാപിത നിക്ഷേപ പദ്ധതികള്‍ (എസ്ഐപി) വ്യവസ്ഥാപിത കൈമാറ്റ പദ്ധതികള്‍ (എസ്ടിപി), ഡിവിഡന്റ് റീഇന്‍വെസ്റ്റ്‌മെന്റ്, ഓഹരി അധിഷ്ഠിത ഫണ്ടുകള്‍, ഡെറ്റ് ഫണ്ടുകള്‍ എന്നീ നിക്ഷേപങ്ങള്‍ക്കും സ്റ്റാമ്പ് ഡ്യൂട്ടി ബാധകമാണ്. നിക്ഷേപിക്കുന്ന തുകയുടെ 0.005 ശതമാനമാണ് സ്റ്റാമ്പ് ഡ്യൂട്ടി ഈടാക്കുക.
അടല്‍ പെന്‍ഷന്‍ യോജന ഓട്ടോ-ഡെബിറ്റ് സൗകര്യം പുനരാരംഭിക്കും
അടല്‍ പെന്‍ഷന്‍ യോജന (എപിവൈ) പദ്ധതി പ്രകാരം അംഗങ്ങളുടെ മാസതവണ അക്കൗണ്ടില്‍നിന്ന് ഓട്ടോ-ഡെബിറ്റ് ചെയ്യുന്ന സൗകര്യം ബാങ്കുകള്‍ പുനരാരംഭിച്ചു. പെന്‍ഷന്‍ ഫണ്ട് റെഗുലേറ്ററി ആന്‍ഡ് ഡവലപ്‌മെന്റ് അതോറിറ്റി ആണ് ഇതുസംബന്ധിച്ച വിവരങ്ങള്‍ പുറത്തുവിട്ടത്. കൊറോണ വൈറസ് മൂലം ജൂണ്‍ 30 വരെ നിര്‍ത്തിവച്ച സൗകര്യം വീണ്ടും ആരംഭിക്കുകയാണ്.
സേവിംഗ്‌സ് അക്കൗണ്ടിലെ പലിശനിരക്ക് കുറച്ചു
രാജ്യത്തെ രണ്ടാമത്തെ ഏറ്റവും വലിയ പൊതുമേഖല ബാങ്കായ പഞ്ചാബ് നാഷണല്‍ ബാങ്ക് (പിഎന്‍ബി) സേവിംഗ്‌സ് അക്കൗണ്ട് നിക്ഷേപത്തിന്റെ പലിശ നിരക്ക് 50 ബേസിസ് പോയിന്റ് ആയി കുറച്ചു. 50 ലക്ഷം രൂപ വരെയുള്ള നിക്ഷേപങ്ങള്‍ക്ക് പുതിയ പലിശ നിരക്ക് 3 ശതമാനമായിരിക്കും. നേരത്തെ 3.50 ശതമാനമായിരുന്നു പലിശ.
ഇപിഎഫ് അക്കൗണ്ടില്‍നിന്ന് പണം പിന്‍വലിക്കാന്‍ സൗകര്യം
കൊവിഡ്-19 ലോക്ക്ഡൗണിലെ സാമ്പത്തിക പ്രതിസന്ധി മറികടക്കാന്‍ ഇപിഎഫ് അക്കൗണ്ട് ഉടമകള്‍ക്ക് അവരുടെ ഇപിഎഫ് അക്കൗണ്ടുകളില്‍ നിന്ന് പണം മുന്‍കൂറായി എടുക്കാന്‍ ഇംപ്ലോയി പ്രൊവിഡന്റ് ഫണ്ട് ഓര്‍ഗനൈസേഷന്‍ (ഇപിഎഫ്ഒ) അനുമതി നല്‍കുന്നു. ലോക്ക്ഡൗണ്‍ സമയത്ത് ഇപിഎഫ്ഒയുടെ പിന്‍വലിക്കല്‍ നിയമങ്ങള്‍ സര്‍ക്കാര്‍ ലഘൂകരിച്ചിരുന്നു.