മലപ്പുറം: മലപ്പുറത്ത് ക്വാറന്റീൻ ലംഘിച്ച് പുറത്തിരങ്ങിയ രണ്ട് യുവാക്കൾക്ക് കൊവിഡ് സ്ഥിരീകരിച്ചു. മലപ്പുറം ജില്ലയിലെ ചീക്കോട്, ഊർങ്ങാട്ടിരി സ്വദേശികളായ രണ്ട് യുവാക്കൾക്കാണ് കൊവിഡ് പോസിറ്റീവായത്. ക്വാറന്റീനിൽ കഴിയവെ നിർദ്ദേശങ്ങൾ ലംഘിച്ച് പൊതു ഇടങ്ങളിൽ ഇറങ്ങി ഇവർ ജനങ്ങളുമായി സമ്പർക്കം പുലർത്തിയിരുന്നു.

ചീക്കോട് സ്വദേശിയായ യുവാവിന് നിരവധി പേരുമായി സമ്പർക്കമുണ്ടായതായാണ് വിവരം. ജൂൺ പതിനെട്ടാം തീയതി ജമ്മുവിൽ നിന്നാണ് യുവാവ് നാട്ടിലേക്കെത്തിയത്. നിരീക്ഷണത്തിൽ കഴിയവെ ഇയാൾ നിരവധി കടകളിലടക്കം പോയിരുന്നു. ജൂൺ 23ന് ഇയാൾ മൊബൈൽ കടയിൽ കയറുന്നതിന്റെ ദൃശ്യങ്ങൾ ലഭിച്ചതിന്റെ അടിസ്ഥാനത്തിൽ കട അടയ്ക്കാൻ പൊലീസ് ഉടമയോട് നിർദ്ദേശിച്ചു. രണ്ട് പേർക്കെതിരെയും പൊലീസ് കേസ് രജിസ്റ്റർ ചെയ്‌തു.

അതേസമയം മലപ്പുറത്ത് എടപ്പാളിലെ രണ്ടു ആശുപത്രികളിലുമായി പരിശോധന നടത്തിയ 680 പേരിൽ 676 പേരുടെ ഫലം നെഗറ്റീവായി. ഒരു വയസുള്ള കുട്ടിക്ക് ഇന്നലെ രോഗം സ്ഥിരീകരിച്ചിരുന്നു. മൂന്നു പേരുടെ ഫലം കൂടി ഇനി പുറത്തുവരാനുണ്ട്.