മുംബയ്: മഹാരാഷ്ട്രയിൽ കൊവിഡ് ബാധിച്ച് മലയാളി മരിച്ചു. മഹാരാഷ്ട്രയിലെ താനെയിൽ താമസിക്കുന്ന ഗീതാ മോഹൻദാസാണ് മരിച്ചത്. 50 വയസായിരുന്നു. ഇവരുടെ മകൻ കൊവിഡ് ബാധിച്ച് ചികിത്സയിലാണ്. ഇതര സംസ്ഥാനത്ത് ഇന്ന് കൊവിഡ് ബാധിച്ച് മരിക്കുന്ന രണ്ടാമത്തെ മലയാളിയാണ് ഗീതാ മോഹൻദാസ്.

നേരത്തെ ഡൽഹിയിലും കൊവിഡ് ബാധിച്ച് മലയാളി മരിച്ചിരുന്നു. ഡൽഹി രമേഷ് നഗറിൽ താമസിക്കുന്ന ചെങ്ങന്നൂർ ആല സ്വദേശി ഷാജി ജോണാണ് മരിച്ചത്. ഡൽഹി എൽ.എൻ.ജെ.പി ആശുപത്രിയിൽ ചികിത്സയിലായിരുന്നു. 24 ദിവസം ചികിത്സയിലായിരുന്ന ഷാജി രോഗം മാറിയെന്ന് ആശുപത്രി അധികൃതർ അറിയിച്ചതോടെ തിരികെ വീട്ടിൽ എത്തിയിരുന്നു. എന്നാൽ കഴിഞ്ഞ ദിവസം വൃക്ക രോഗത്തിന്റ പരിശോധനക്ക് എത്തിയ ഷാജിക്ക് വീണ്ടും കൊവിഡ് പരിശോധന നടത്തിയപ്പോൾ പോസിറ്റീവായി. ഇതോടെ വീണ്ടും എൽ.എൻ.ജെ.പി ആശുപത്രിയിൽ പ്രവേശിപ്പിക്കുകയായിരുന്നു. ഇന്ന് പുലർച്ചയോടെയാണ് ഷാജി മരിച്ചത്.