ന്യൂഡൽഹി: അതിർത്തിയിലെ പാക് പ്രകോപനത്തിന് ശക്തമായ മറുപടി നൽകി ഇന്ത്യയുടെ വീരപുത്രന്മാർ. ജമ്മു കാശ്മീരിലെ പൂഞ്ച് ജില്ലയിലെ മൂന്ന് സെക്ടറുകളിലായി വെടിനിർത്തൽ കരാർ ലംഘിച്ച പാകിസ്ഥാൻ സൈന്യത്തിന് നേരെയാണ് ഇന്ത്യ തിരിച്ചടിച്ചത്. സംഘർഷത്തിൽ രണ്ട് പാക് സൈനികർ കൊല്ലപ്പെട്ടതായും മൂന്ന് പാകിസ്ഥാൻ പട്ടാളക്കാർക്ക് പരിക്കേറ്റതായുമുള്ള വിവരമാണ് പുറത്തുവരുന്നത്.

ഷാപൂർ, കിർണി സെക്ടറുകളും പാകിസ്ഥാൻ വെടിനിർത്തൽ കരാർ ലംഘിച്ചയിടങ്ങളിൽ പെടുന്നു. പാകിസ്ഥാൻ സൈന്യത്തിന്റെ പ്രകോപനത്തെ തുടർന്ന് രാഖ് ചിക്രിയിലുള്ള പാകിസ്ഥാൻ പോസ്റ്റുകൾക്ക് നേരെയാണ് ഇന്ത്യൻ സൈന്യം വെടിവച്ചത്.

പാകിസ്ഥാന്റെ '10 ബലോച്ച് റെജിൻമെന്റി'ലെ സൈനികരെയാണ് ഇന്ത്യൻ സൈന്യം കാലപുരിക്കയച്ചത്. ലഡാക്കിലെ ചൈനീസ് പ്രകോപനത്തിന്റെ സാഹചര്യം മുതലെടുത്തുകൊണ്ടാണ് പാകിസ്ഥാൻ ഇന്ത്യൻ സൈന്യത്തിന് നേരെ ആക്രമണത്തിന് മുതിരുന്നതെന്നാണ് അനുമാനം.