സ്വർണക്കടത്ത് കേസിൽ മുഖ്യമന്ത്രി പിണറായി വിജയനെ വിമർശിച്ച് ചലച്ചിത്ര സംവിധായകൻ മിഥുൻ മാനുവൽ തോമസിന്‍റെ ഫേസ്‌ബുക്ക് പോസ്റ്റ്. പിണറായി നല്ലത് ചെയ്‌തപ്പോഴൊക്കെ കയ്യടിച്ചിട്ടുണ്ടെന്നും ഇപ്പോൾ നടന്നത് സംഭവിക്കാൻ പാടില്ലാത്ത വിഴ്ചയായി പോയെന്നും മിഥുൻ ഫേസ്ബുക്കിൽ കുറിച്ചു. പിണറായി വിജയനും മുൻ മുഖ്യമന്ത്രി ഉമ്മൻ ചാണ്ടിയും ഒരേ തൂവൽ പക്ഷികൾ ആയി മാറുന്ന ഈ ഫൈനൽ ട്വിസ്റ്റ്‌ ആർക്കും ഊഹിക്കാൻ കഴിഞ്ഞില്ലെന്നാണ് മിഥുൻ വിമർശിച്ചിരിക്കുന്നത്. ആട്, അഞ്ചാംപാതിര ഉൾപ്പെടെയുള്ള ഹിറ്റ് ചിത്രങ്ങൾ ഒരുക്കിയ യുവ സംവിധായകനാണ് മിഥുൻ.
മിഥുന്‍റെ ഫേസ്‌ബുക്ക് പോസ്റ്റിന്‍റെ പൂർണരൂപം
മുഖ്യമന്ത്രി ശ്രീ പിണറായി വിജയനും മുൻ മുഖ്യമന്ത്രി ശ്രീ ഉമ്മൻ ചാണ്ടിയും ഒരേ തൂവൽ പക്ഷികൾ ആയി മാറുന്ന ഈ ഫൈനൽ ട്വിസ്റ്റ്‌ ഒരുമാതിരി ആർക്കും ഊഹിക്കാൻ കഴിഞ്ഞില്ല എന്നതാണ് വാസ്തവം.. !! പിണറായി സാർ, നല്ലത് നിങ്ങൾ ചെയ്തപ്പോൾ എല്ലാംതന്നെ കയ്യടിച്ചിട്ടുണ്ട്.. !! പക്ഷേ, ഇപ്പോൾ നടന്നത് സംഭവിക്കാൻ പാടില്ലാത്ത വീഴ്ചയായിപ്പോയി.. !! സ്വന്തം വകുപ്പിൽ നടക്കുന്ന കാര്യങ്ങൾ അറിഞ്ഞില്ല എന്ന ജാഗ്രത ഒട്ടുമില്ലാത്ത തരത്തിലുള്ള മറുപടികൾ ഈ കേസിൽ മതിയാവില്ല.. !! ഉപ്പുതീനികൾ ആര് തന്നെ ആയാലും വെള്ളം കുടിച്ചേ മതിയാകൂ.. !! കഷ്ടം.. !!