വാഷിംഗ്ടൺ: കൊവിഡ്​ വ്യാപനവുമായി ബന്ധപ്പെട്ട ആരോപണ പ്രത്യാരോപണങ്ങൾ തുടരുന്നതിനിടെ ലോകാരോഗ്യ സംഘടനയിൽനിന്ന്​ ഔദ്യോഗികമായി പിൻമാറാൻ അമേരിക്കയുടെ തീരുമാനം. യു.എൻ സെക്രട്ടറി ജനറൽ അ​ന്റോണിയോ ഗുട്ടറസിനെ അമേരിക്കയുടെ ഔദ്യോഗിക തീരുമാനം അറിയിച്ചു.

അമേരിക്ക ലോകാരോഗ്യ സംഘടനയിൽനിന്ന്​ പിന്മാറാൻ നോട്ടീസ്​ നൽകിയ വിവരം യു.എൻ സെക്രട്ടറി ജനറലിന്റെ വക്താവ്​ സ്​ഥിരീകരിച്ചു. പിൻമാറ്റം 2021 ജൂലായ് ആറിന്​ പ്രാബല്യത്തിൽ വരും.

അമേരിക്ക ലോകാരോഗ്യ സംഘടനക്ക്​ നൽകിവരുന്ന സാമ്പത്തിക സഹായം പിൻവലിക്കുമെന്ന പ്രസിഡന്റ് ​ഡൊണാൾഡ്​ ട്രംപിന്റെ ഭീഷണിക്ക്​ പിന്നാലെയാണ്​ യു.എസിന്റെ പിൻമാറ്റം. ഇതോടെ അമേരിക്ക ഡബ്ല്യു.എച്ച്.ഒയ്ക്ക് നൽകിവന്നിരുന്ന സാമ്പത്തിക സഹായവും നിലച്ചേക്കും.

ലോകാരോഗ്യ സംഘടനയ്ക്ക്​ ഏറ്റവും കൂടുതൽ സാമ്പത്തിക സഹായം നൽകിവരുന്ന രാജ്യമാണ്​ അമേരിക്ക. 3000 കോടി രൂപയുടെ സാമ്പത്തിക സഹായമാണ്​ അമേരിക്ക നൽകിവന്നിരുന്നത്​. മൊത്തം സംഘടനയ്ക്ക്​ ലഭിക്കുന്ന തുകയുടെ 15 ശതമാനം വരുമിത്. കൊവിഡ്​ ബാധയെക്കുറിച്ചും വ്യാപനത്തെക്കുറിച്ചും ലോകാരോഗ്യ സംഘടനയ്ക്ക്​ അറിവുണ്ടായിരുന്നുവെന്നും ചൈനയ്ക്ക്​ വേണ്ടി ഇതു മറച്ചുവെച്ചെന്നും നേരത്തേ ട്രംപ്​ കുറ്റപ്പെടുത്തിയിരുന്നു. മാത്രമല്ല,​ കൊവിഡ്​ ബാധിതരുടെ എണ്ണത്തിൽ വൻവർദ്ധനയുണ്ടായ സാഹചര്യത്തിൽ ഡോണാൾഡ്​ ട്രംപ്​ ലോകാരോഗ്യ സംഘടനയ്ക്കെതിരെയും ചൈനയ്ക്കെതിരെയും രംഗത്തെത്തിയിരുന്നു. എന്നാൽ, ലോകം ഒരു മഹാമാരിയെ നേരിടുന്ന സമയത്ത് ഇത്തരം കുപ്രചരണങ്ങൾ നടത്തരുതെന്നായിരുന്നു ലോകാരാഗ്യസംഘടനയുടെ മറുപടി. ചൈനയിൽനിന്നാണ് പൊട്ടിപ്പുറപ്പെട്ടതെങ്കിലും കൊവിഡ് മഹാമാരി ഏറ്റവുമധികം പ്രത്യാഘാതങ്ങളുണ്ടാക്കിയത് അമേരിക്കയിലാണ്.