2.1 സ്ക്വയർ മൈൽ മാത്രം വിസ്തൃതിയുള്ള മനോഹരമായ ഒരു കുഞ്ഞൻ ദ്വീപാണ് സാർക്. ഫ്രാൻസിലെ നോർമാൻഡി തീരത്തിന് സമീപം ഇംഗ്ലീഷ് ചാനലിന് തെക്ക് പടിഞ്ഞാറായാണ് ഈ ദ്വീപസമൂഹം സ്ഥിതി ചെയ്യുന്നത്. ഏകദേശം 500 പേർ മാത്രമാണ് ഇവിടെ താമസിക്കുന്നത്. ഏറെ പ്രത്യേകതകളുള്ള ഈ കുഞ്ഞൻ ദ്വീപിലെ മുഖ്യ ആകർഷണ കേന്ദ്രം ഒരു തടവറയാണ്. ദ്വീപിനെ പോലെ തന്നെ തടവറയും തീരെ ചെറുതാണ്. ലോകത്ത് ഇന്ന് ഉപയോഗത്തിലുള്ളതിൽ ഏറ്റവും ചെറിയ ജയിലാണ് ഇത്. സാർക് ഐലൻഡ് പ്രിസൺ. !

ജനാലകൾ ഇല്ലാത്ത രണ്ട് സെല്ലുകളും അവയെ തമ്മിൽ ബന്ധിക്കുന്ന ഒരു ഇടനാഴിയും മാത്രമാണ് ജയിലിലുള്ളത്. തടികൊണ്ടുണ്ടാക്കിയ ഒരു ചെറിയ കട്ടിലും കനം കുറഞ്ഞ മെത്തയും ഇരു സെല്ലുകൾക്കുമുള്ളിലുണ്ട്. 1856ലാണ് ഈ ജയിൽ പണികഴിപ്പിച്ചത്. രണ്ട് ദിവസം മാത്രമാണ് ഇവിടെ കുറ്റവാളികളെ പാർപ്പിക്കുക. ഗുരുതരമായ കുറ്റമാണെങ്കിൽ ഇവിടെ നിന്നും തൊട്ടടുത്ത ഗ്വെൺസെയ് ദ്വീപിലെ ജയിലിലേക്ക് തടവുകാരെ മാറ്റും.

ജോലിയ്ക്ക് നിന്ന വീട്ടിലെ സ്ത്രീയുടെ തൂവാല മോഷ്ടിച്ച കുറ്റത്തിന് ഒരു പെൺകുട്ടിയെ ആണ് ആദ്യമായി ഇവിടെ തടവിൽ പാർപ്പിച്ചതെന്ന് പറയുന്നു. തടവറയിലെ ഇരുട്ടിൽ മൂന്ന് ദിവസമാണ് പെൺകുട്ടി പേടിച്ച് കഴിഞ്ഞത്.

1990ൽ ഫ്രഞ്ച് അണുകേന്ദ്ര വിജ്ഞാന ഗവേഷകനായ ആൻഡ്രെ ഗാർഡെസ് എന്നയാൾ ഫ്രാൻസിൽ നിന്നും ഓട്ടോമാറ്റിക് ആയുധങ്ങളുമായി ദ്വീപിലേക്കെത്തുകയും ഇവിടുത്തെ താമസക്കാരെ ഭീഷണിപ്പെടുത്തുകയും ചെയ്തു. സാർക് ദ്വീപിന്റെ അധിപൻ താനാണെന്നും ഇനി മുതൽ ജനങ്ങൾ തന്നെ അനുസരിച്ച് ജീവിക്കണമെന്നും ആൻഡ്രെ പറഞ്ഞു. ആൻഡ്രെയുടെ മുഖത്തിനിട്ട് സാർക് ദ്വീപിലെ ഒരു പോലീസുകാരൻ ഇടിച്ചിരുന്നു. ശേഷം അറസ്റ്റ് ചെയ്ത് ഈ ജയിലാക്കി. ഇതാണ് ഇവിടെ അവസാനമായി നടന്ന ഏറ്റവും വലിയ കുറ്റകൃത്യം.

ഇപ്പോഴും സാർക് ദ്വീപിൽ പൊലീസ് ഉണ്ട്. പക്ഷേ, രണ്ട് പൊലീസുകാർ മാത്രമാണുള്ളത്. ഒരു കോൺസ്റ്റബിളും ഒരു അസിസ്റ്റന്റ് കോൺസ്റ്റബിളും. പെപ്പർ സ്പ്രേയാണ് പൊലീസുകാരുടെ ആയുധം. മദ്യം, മയക്കുമരുന്ന് എന്നിവയുമായി ബന്ധപ്പെട്ട കുറ്റകൃത്യങ്ങളാണ് ദ്വീപിലേറെയും.

സാർക് ദ്വീപിന്റെ മറ്റൊരു പ്രത്യേകത എന്തെന്നാൽ ഇവിടെ കാറുകൾ ഉപയോഗിക്കില്ല എന്നതാണ്. പകരം കുതിര വണ്ടി, സൈക്കിൾ, ട്രാക്ടർ എന്നിവയ്ക്ക് നിരോധനമില്ല. ഭിന്നശേഷിയുള്ളവർക്കും വയോധികർക്കും ബാറ്ററി ഉപയോഗിച്ചുള്ള ബഗ്ഗികളും അനുവദിക്കും.