കണ്ണൂര്‍: സ്വര്‍ണക്കടത്ത് വിവാദത്തിൽ മുഖ്യമന്ത്രി രാജിവയ്ക്കണമെന്ന് ആവശ്യപ്പെട്ട് യുവജന സംഘടനകൾ നടത്തുന്ന പ്രക്ഷോഭങ്ങൾക്കെതിരെ വ്യവസായ മന്ത്രി ഇ.പി ജയരാജൻ. സംസ്ഥാനത്ത് കൊവിഡ് വ്യാപിക്കുന്ന സാഹചര്യത്തിൽ നടക്കുന്ന സമരങ്ങൾ സമരാഭാസമാണെന്ന് മന്ത്രി വിമർശിച്ചു.
"സമരക്കാര്‍ കൊവിഡ് വരാതിരിക്കാൻ നോക്കിക്കോ. വെറുതേ കൊവിഡ് വന്ന് ചാവണ്ട. എത്ര അന്വേഷണം നടത്തിയാലും മുഖ്യമന്ത്രിയുടെ ഓഫീസ് കേന്ദ്രീകരിച്ച് ഒരു അന്വേഷണവും നടത്തില്ല. വകതിരിവില്ലാത്തവരുടെ ആഹ്വാനം കേട്ട് ആരും ഇറങ്ങിപ്പുറപ്പെടേണ്ട." എന്നായിരുന്നു മന്ത്രിയുടെ പ്രതികരണം.
സ്വര്‍ണക്കടത്ത് കേസിൽ മുഖ്യമന്ത്രി പിണറായി വിജയന്‍റെ രാജി ആവശ്യപ്പെട്ട് യൂത്ത് കോൺഗ്രസ്, യൂത്ത് ലീഗ്, യുവമോര്‍ച്ച സംഘടനകള്‍ സംസ്ഥാന വ്യാപകമായി ഇന്ന് പ്രതിഷേധം നടത്തിയിരുന്നു. കണ്ണൂരിൽ സമരക്കാർ മന്ത്രി ഇ പി ജയരാജനെയും തടഞ്ഞിരുന്നു. തെരുവ് സമരങ്ങൾക്കെതിരെ ശക്തമായ ഭാഷയിലാണ് ആരോഗ്യമന്ത്രിയും പ്രതികരിച്ചത്. മാസ്ക് പോലും ധരിക്കാതെ തെരുവിലിറങ്ങുന്ന അണികളെ നേതാക്കന്മാർ പറഞ്ഞു മനസിലാക്കണം എന്നായിരുന്നു ആരോഗ്യമന്ത്രിയുടെ പ്രതികരണം.