കൊൽക്കത്ത: കാൺപൂരിലെ കുപ്രസിദ്ധ ഗുണ്ട വികാസ് ദുബെയെ വെടിവച്ചുകൊന്ന നടപടിയിൽ യു.പി സർക്കാരിനെ വിമർശിച്ച് തൃണമൂൽ കോൺഗ്രസ് എം.പി മെഹുവ മൊയിത്ര. മുഖ്യമന്ത്രി യോഗിയുടെ ഭരണത്തെ എൻകൗണ്ടർ രാജ് എന്ന് വിശേഷിപ്പിച്ച മെഹുവ,​ യോഗിയുടെ കീഴിൽ നിയമം നടപ്പിലാക്കുകയെന്നാൽ എൻകൗണ്ടറാണെന്ന് ആരോപിച്ചു. നീതി നടപ്പിലാക്കേണ്ടത് കോടതിയാണ്. കുറ്റവാളികളെ പിടികൂടുകയെന്നതാണ് പൊലീസിന്റെ ഉത്തരവാദിത്വം. യോഗി സർക്കാർ ഈ രണ്ടിനെയും ആശയക്കുഴപ്പത്തിലാക്കുകയാണെന്നും മെഹുവ ട്വീറ്റ് ചെയ്തു. കൊല്ലുക എന്നതു മാത്രമാണ് യോഗിയുടെ എൻകൗണ്ടർ രാജിലെ നീതിയെന്നും മഹുവ വിമർശിക്കുന്നുണ്ട്.