ന്യൂഡൽഹി: ബ്ളൂംബെർഗിന്റെ ശതകോടീശ്വര പട്ടികയിൽ വാറൻ ബഫറ്രിനെ പിന്നിലാക്കി റിലയൻസ് ഇൻഡസ്‌ട്രീസ് ചെയർമാൻ മുകേഷ് അംബാനി. 6,​990 കോടി ഡോളറിന്റെ (5.25 ലക്ഷം കോടി രൂപ)​ ആസ്‌തിയുമായി ഏഴാം സ്ഥാനത്താണ് മുകേഷ്. എട്ടാംസ്ഥാനത്തുള്ള ബഫറ്റിന്റെ ആസ്‌തി 6,​860 കോടി ഡോളർ (5.15 ലക്ഷം കോടി രൂപ)​. ബെർക്ക്‌ഷെയർ ഹാത്ത്‌വേയുടെ ചെയർമാനായ വാറൻ ബഫറ്റ് ആദ്യമായാണ് എട്ടാംസ്ഥാനത്തേക്ക് വീഴുന്നത്.

2012ലാണ് ബ്ളൂംബെർഗ് ശതകോടീശ്വര പട്ടിക പുറത്തുവിട്ടു തുടങ്ങിയത്. അന്നുമുതൽ കഴിഞ്ഞമാസം വരെ,​ ടോപ് 5നുള്ളിലെ നിറസാന്നിദ്ധ്യമായിരുന്നു 89കാരനായ ബഫറ്റ്. സന്നദ്ധസേവനങ്ങൾക്കായി ആസ്‌തിയിലെ നിശ്‌ചിത തുക മാറ്റിവയ്ക്കുന്നതിനാലാണ് ബഫറ്റിന്റെ റാങ്ക് താഴുന്നത്. റിലയൻസിന്റെ ഡിജിറ്റൽ/ടെലികോം വിഭാഗമായ ജിയോയിലേക്ക് വിദേശ നിക്ഷേപം വൻതോതിൽ ഒഴുകിയതാണ് മുകേഷ് അംബാനിക്ക് നേട്ടമായത്.