ന്യൂഡല്‍ഹി: രാജ്യത്ത് 24 മണിക്കൂറിനിടെ 27,114 പേര്‍ക്ക് പുതുതായി കൊവിഡ് സ്ഥിരീകരിച്ചു. രോഗികളുടെ എണ്ണത്തില്‍ ഇതുവരെയുള്ളതിലെ ഏറ്റവും വലിയ പ്രതിദിന വര്‍ദ്ധനയാണിത്. കഴിഞ്ഞ 24 മണിക്കൂറിനിടെ 519 പേരാണ് രാജ്യത്ത് മരിച്ചത്. ഇതോടെ ഇന്ത്യയിലെ കൊവിഡ് ബാധിതരുടെ എണ്ണം എട്ടുലക്ഷം കടന്നു. നിലവിൽ ആകെയുള്ള രോഗബാധിതരുടെ എണ്ണം 8,20,916 ആയി.

2,83,407 സജീവ കേസുകളാണ് രാജ്യത്തുള്ളത്. 5,15,386 പേര്‍ രോഗമുക്തി നേടി. 22,123 പേര്‍ക്കാണ് ഇതിനോടകം കൊവിഡ് ബാധിച്ച് ജീവന്‍ നഷ്ടമായത്. ഇതുവരെ 1,13,07,002 സാമ്പിളുകള്‍ രാജ്യത്ത് പരിശോധിച്ചതായി ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ച് അറിയിച്ചു. ഇന്നലെ മാത്രം 2,82,511 സാമ്പിളുകളാണ് പരിശോധിച്ചത്.

രാജ്യത്ത് ഏറ്റവും കൂടുതൽ കൊവിഡ് ബാധിതരുള്ള മഹാരാഷ്ട്രയിൽ 2,38,461 പേര്‍ക്കാണ് രോഗം സ്ഥിരീകരിച്ചത്. 1,32,625 പേര്‍ രോഗമുക്തി നേടി. 95,943 പേരാണ് ചികിത്സയിലുള്ളത്. 9,893 പേരാണ് മഹാരാഷ്ട്രയില്‍ ഇതിനോടകം കൊവിഡ് ബാധയെ തുടര്‍ന്ന് മരിച്ചത്.

മഹാരാഷ്ട്രയ്ക്ക് തൊട്ടുപിന്നിലുള്ള തമിഴ്‌നാട്ടില്‍ 1,30,261 പേര്‍ക്കാണ് രോഗം സ്ഥിരീകരിച്ചത്. 1,829 പേര്‍ മരിച്ചു. 82,324 പേര്‍ രോഗമുക്തി നേടി. 46,108 പേരാണ് നിലവില്‍ ചികിത്സയില്‍ തുടരുന്നത്. രാജ്യതലസ്ഥാനമായ ഡല്‍ഹിയില്‍ 1,09,140 പേര്‍ക്കാണ് ഇതുവരെ രോഗം സ്ഥിരീകരിച്ചിട്ടുള്ളത്. 3,300 പേര്‍ക്ക് ജീവന്‍ നഷ്ടമായി. 84,694 പേര്‍ രോഗമുക്തി നേടി. 21,146 പേര്‍ ചികിത്സയില്‍ തുടരുകയാണ്.