ഷോർട്ട് ഫിലിമുകളിലൂടെ മലയാളികൾക്ക് ഏറെ സുപരിചിതനായ ചെറുപ്പക്കാരനാണ് കാർത്തിക് ശങ്കർ. ലോക്ക്ഡൗൺ സമയത്ത് നിരവധി പേരാണ് കാർത്തികിന്റെ യൂട്യൂബ് ചാനൽ തിരഞ്ഞുപിടിച്ച് കണ്ടത്. കാർത്തിക് പുറത്തിറക്കിയ ' മോം ആൻഡ് സൺ ' എന്ന കോമഡി സീരീസ് തന്നെയാണ് കാരണം. എട്ടു ലക്ഷത്തിലേറെ സബ്സ്ക്രൈബേഴ്സാണ് കാർത്തികിന്റെ യൂട്യൂബ് ചാനലിനുള്ളത്.

ഏറെ കാത്തിരുന്ന സീരീസിന്റെ ഒമ്പതാം ഭാഗവും എത്തിയിട്ടുണ്ട്. അജു വർഗീസ്, ധ്യാൻ ശ്രീനിവാസൻ, വിശാഖ് സുബ്രമണ്യം എന്നിവർ ചേർന്ന ഫൺടാസ്റ്റിക് ഫിലിംസ് ആണ് ഒമ്പതാം ഭാഗം നിർമിച്ചിരിരിക്കുന്നത്. ഏറെ സർപ്രൈസുകളോടെത്തിയ പുതിയ ഭാഗത്തിൽ അതിഥി വേഷത്തിൽ അജു വർഗീസ് എത്തുന്നുണ്ട്.

താൻ ഗുരുതുല്യനായി സ്നേഹിക്കുന്ന വ്യക്തിയാണ് അജു വർഗീസ് എന്നും അതിന് പിന്നിലെ കാരണവും ഫേസ്ബുക്ക് പോസ്റ്റിലൂടെ പങ്കുവച്ചിരിക്കുകയാണ് കാർത്തിക്. ഇത്രയും ഷോർട്ട് ഫിലിം ചെയ്തിട്ടും സിനിമമേഖലയിൽ നിന്നും ആകെ വിളിച്ച മൂന്നുപേരിൽ ആദ്യത്തെ മനുഷ്യൻ അജുവാണെന്നും ആ അജു തന്നെ തന്റെ വീഡിയോയിൽ അഭിനയിക്കുന്ന ആദ്യ സെലിബ്രിറ്റിയായി മാറിയതിന്റെയും സന്തോഷത്തിലാണ് കാർത്തിക്.

കാർത്തിക് ശങ്കറിന്റെ പോസ്റ്റിന്റെ പൂർണ രൂപം വായിക്കാം

അമ്മയും മകനും പാർട്ട് 9 എനിക്ക് ഒരു inspiration ആണ്. ഒപ്പം ഒരുപാട് പ്രത്യേകതകളും പ്രതീക്ഷകളും. കാരണം ചെറുപ്പം മുതലേ സ്വപ്നം സിനിമ മാത്രം. ചെയ്തിരുന്ന ജോലി രാജിവെപ്പിച്ചാണ് 'അമ്മ എന്നെ ഷോർട്ട് ഫിലിം പിടിക്കാൻ പറഞ്ഞു വിടുന്നത്. അന്നും എന്റെ കഴിവിൽ എന്നെക്കാൾ വിശ്വാസം അമ്മക്കായിരുന്നു. നീണ്ട 8 വർഷങ്ങൾ. സംവിധാന സഹായി ആയി നിന്ന ദിവസങ്ങൾ. കോടമ്പാക്കത്തെ കൈപ്പേറിയ സിനിമ ദിനങ്ങൾ. 25 ൽ പരം ഷോർട്ട് ഫിലിമുകൾ. ചെറുതും വലുതുമായി 30ന് മുകളിൽ ചെറു വീഡിയോകൾ. എല്ലാം അത്യാവശ്യം ജനശ്രദ്ധ നേടിയിട്ടുണ്ടെന്ന് വിശ്വസിക്കുന്നു. അപ്പോഴും സിനിമ എന്ന സ്വപ്നം വിദൂരമായിരുന്നു. പക്ഷെ, ഒരിക്കൽ പോലും സിനിമ എന്ന മേഖല വിട്ട് മ​റ്റൊന്നിലേക്ക് പോകാൻ ആഗ്രഹിച്ചിരുന്നില്. മനുഷ്യരാശിക്ക് ഭീഷണിയായി വന്ന കൊറോണ lockdown.

അമ്മയും മോനും സീരീസ് തുടങ്ങി. സീരീസ് ആയിട്ടല്ല തുടങ്ങിയതെങ്കിലും എന്റെ പ്രേക്ഷകർ നൽകിയ സ്‌നേഹം. അത് സീരീസ് ആയിമാറി. അങ്ങനെ ഇരിക്കുമ്പോൾ വിശാഖ് സുബ്രഹ്മണ്യം വിളിക്കുന്നു. ഞാൻ ഗുരുതുല്യനായി കാണുന്ന ഒരാളുടെ മുഖത്ത് ക്യാമറ വെക്കാൻ അവസരം. ' അജു വർഗ്ഗീസ് '. ഈ മനുഷ്യനെ മനസിന്റെ ഒരു പ്രധാന കോണിൽ പ്രതിഷ്ഠിക്കാൻ തുടങ്ങിയത് കുറച്ചു വർഷം മുൻപാണ് . ഇത്രയും ഷോർട്ട് ഫിലിം ചെയ്തിട്ടും സിനിമമേഖലയിൽ നിന്നും ആകെ വിളിച്ച മൂന്നുപേരിൽ ആദ്യത്തെ മനുഷ്യൻ. 'നമ്മുടെ സ്വന്തം സ്വർഗം ' എന്ന ഷോർട്ട് ഫിലിം ഇറങ്ങിയ ദിവസം ഒരു കാൾ. 'മോനെ ഞാൻ അജു വർഗ്ഗീസ് ആണ്. ഷോർട്ട് ഫിലിം കണ്ടു നന്നായിട്ടുണ്ട്.

' അതിൽ അഭിനയിച്ച മ​റ്റുള്ളവരെയും അദ്ദേഹം വിളിച്ചു അഭിനന്ദിച്ചു. (എത്രപേർ ചെയ്യും അറിയില്) അന്നുമുതൽ ഒരു ഗുരുവിനെപോലെ അദ്ദേഹം മനസ്സിലുണ്ട്. ഇന്ന് ആദ്യമായി ഒരു സെലിബ്രിറ്റിയുടെ മുഖത്തു ക്യാമറ വെച്ചത് അതേ അജുച്ചേട്ടന്റെ മുഖത്തും. എല്ലാം ദൈവാനുഗ്രഹവും നിങ്ങളുടെ പിന്തുണയും ഒപ്പം മാതാപിതാക്കളുടെയും ഗുരുക്കന്മാരുടെയും പ്രാർത്ഥനയും അനുഗ്രഹവും ....!! എന്നെപോലെ പൂജ്യത്തിൽ നിന്ന് തുടങ്ങിയ ഒരാൾക്ക് ഇവിടംവരെ എത്താൻ കഴിഞ്ഞത് സ്വപ്നതുല്യമാ. അതുകൊണ്ട് ഒന്ന് ഉറപ്പിച്ചോ. കളങ്കമില്ലാത്ത അങ്ങ് ആഗ്രഹിക്കുക. ഗുരുത്വം വിട്ടു കളിക്കാതിരിക്കുക. എല്ലാം ആഗ്രഹിക്കുംപോലെ വരും. ഈ അവസരത്തിൽ ഒരാൾക്കുകൂടി നന്ദി പറയണം. എന്നെ വിശാഖിന് നിർദ്ദേശിച്ച അദ്വൈത ശ്രീകാന്ത്!! എന്റെ ഒപ്പം നിസ്വാർത്ഥമായി ജോലി ചെയ്ത എല്ലാ കലാകാരന്മരേയും ഈ അവസരത്തിൽ ഓർക്കുന്നു. എല്ലാം മുരുകൻ തുണൈ...!