കൊച്ചി: സ്വർണക്കടത്ത് കേസിൽ എൻ.ഐ.എ കോടതി റിമാൻഡ് ചെയ്ത പ്രതികളായ സ്വപ്ന സുരേഷിനെയും സന്ദീപ് നായരേയും കൊവിഡ് കെയർ സെൻററുകളിലേക്ക് മാറ്റി. സ്വപ്നയെ തൃശൂരിലെ അമ്പിളിക്കല ഹോസ്റ്റലിലേക്കും സന്ദീപ് നായരെ അങ്കമാലി കറുകുറ്റിയിലെ കൊവിഡ് കെയർ സെൻററിലേക്കുമാണ് മാറ്റിയത്. ഇവരുടെ കൊവിഡ് പരിശോധന ഫലം നാളെ ലഭിക്കുമെന്നാണ് വിവരം.

പ്രതികളെ കസ്റ്റഡിയിൽ ലഭിക്കാനുള്ള അപേക്ഷ എൻ.ഐ.എ നാളെ കോടതിയിൽ സമർപ്പിച്ചേക്കും. കൊവിഡ് പരിശോധന ഫലം നെഗറ്റീവ് ആയാൽ ഇരുവരെയും കോടതിയിൽ ഹാജരാക്കി കസ്റ്റഡിയിൽ വിടാനാണ് സാധ്യത. പത്ത് ദിവസത്തെ കസ്റ്റഡി എൻ.ഐ.എ ആവശ്യപ്പെടുമെന്നാണ് വിവരം.

ഇന്ന് വൈകീട്ടോടെ കൊച്ചിയിലെ എൻ.ഐ.എ പ്രത്യേക കോടതിയിൽ ജഡ്ജ് പി. കൃഷ്ണകുമാറിന് മുമ്പാകെയാണ് പ്രതികളെ ഹാജരാക്കിയത്. പ്രതികളെ കസ്റ്റഡിയിൽ വിട്ടുകിട്ടാൻ എൻ ഐ എ ഹർജി സമർപ്പിച്ചെങ്കിലും കോടതി അനുവദിച്ചില്ല. കൊവിഡ് റിസൾട്ട്‌ നെഗറ്റീവ് ആണെങ്കിൽ അടുത്ത ദിവസം പ്രതികളെ ഹാജരാക്കാൻ കോടതി നിർദേശം. കസ്റ്റഡി അപേക്ഷ അപ്പോൾ പരിഗണിക്കാമെന്നും കോടതി വ്യക്തമാക്കി. തുടർന്ന് ഇരുവരെയും റിമാൻഡ് ചെയ്യുകയായിരുന്നു.