ഗാന്ധിനഗർ:രാത്രികാല കർഫ്യൂ ലംഘിച്ചതിന് ഗുജറാത്ത് മന്ത്രിയുടെ മകനെയും കൂട്ടുകാരെയും അറസ്റ്റുചെയ്ത പൊലീസുകാരിയെ മണിക്കൂറുകൾക്കുള‌ളിൽ സ്ഥലം മാറ്റി. സുനിത യാദവ് എന്ന പൊലീസുകാരിയെയാണ് സ്ഥലം മാറ്റിയത്. വാർച്ചാ റോഡ് മണ്ഡലത്തിലെ എം എൽ എയും സംസ്ഥാന ആരോഗ്യ മന്ത്രിയുമായ കുമാർ കാനാനിയുടെ മകൻ പ്രകാശ് കനാനിയെയാണ് സുനിത അറസ്റ്റുചെയ്തത്.

പ്രകാശിന്റെ കൂട്ടുകാരിൽ ചിലർ കർഫ്യൂ ലംഘിക്കുന്നത് സുനിത ചോദ്യം ചെയ്തു. ഇതോടെ കൂട്ടുകാർ പ്രകാശിനെ വിളിച്ചുവരുത്തുകയായിരുന്നു. സ്ഥലത്തെത്തിയ പ്രകാശ് സുനിതയുമായി ചൂടേറിയ വാദപ്രതിവാദത്തിൽ ഏർപ്പെടുകയായിരുന്നു. തുടർന്നായിരുന്നു അറസ്റ്റ്. അറസ്റ്റിലായവരെ പിന്നീട് ജാമ്യത്തിൽ വിട്ടു. അല്പം കഴിഞ്ഞപ്പോഴായിരുന്നു സ്ഥലംമാറ്റം.

അറസ്റ്റിനെക്കുറിച്ച് പൊലീസ് അന്വേഷത്തിന് ഉത്തരവിട്ടി​ട്ടുണ്ട്. എന്നാൽ സ്ഥലംമാറ്റത്തിനെക്കുറിച്ചോ അന്വേഷണത്തെക്കുറിച്ചോ പ്രതികരിക്കാൻ അധികൃതർ തയ്യാറായിട്ടില്ല.