കാലിഫോർണിയ: ആറ് ദിവസം നീണ്ട തിരച്ചിലിനൊടുവിൽ നടിയും ​ഗായികയും മോഡലുമായ നയാ റിവേരയുടെ മൃതദേഹം പിരു തടാകത്തിൽ നിന്ന് കണ്ടെടുത്തു. ലോസ് ആഞ്ജലസിൽ ഡൗൺടൗണിന് ഏകദേശം 90 കിലോമീറ്റർ വടക്കുപടിഞ്ഞാറായി സ്ഥിതിചെയ്യുന്ന തടാകത്തിൽ 33 കാരിയായ റിവേരയെ ബുധനാഴ്ചയാണ് കാണാതായത്. നാല് വയസുള്ള മകനൊപ്പം ബോട്ടിൽ യാത്ര ചെയ്യുമ്പോഴായിരുന്നു സംഭവം.

പിരു തടാക ജലസംഭരണിയിൽ ബുധനാഴ്ച റിവേര ഒരു ബോട്ട് വാടകയ്‌ക്കെടുത്തിരുന്നു. തുടർന്ന് മകനെ ലൈഫ് ജാക്കറ്റ് ധരിച്ച നിലയിൽ ബോട്ടിൽ കണ്ടെത്തി. എന്നാൽ റിവേരയെ കുറിച്ച് യാതൊരു വിവരവും ഉണ്ടായിരുന്നില്ല. നടി വെള്ളത്തിൽ മുങ്ങിപ്പോയിട്ടുണ്ടാകാം എന്ന അനുമാനത്തിലായിരുന്നു പൊലീസ്. ബോട്ടുകളും ഹെലികോപ്റ്ററുകളും ഉപയോഗിച്ചാണ് തിരച്ചിൽ നടത്തിയത്. തുടർന്നാണ് നടിയുടെ മൃതദേഹം കണ്ടെത്തിയത്.

താനും അമ്മയും തടാകത്തിൽ നീന്തുകയായിരുന്നെന്നും, താൻ തിരിച്ചു ബോട്ടിൽ കയറിയിട്ടും അമ്മയെ കണ്ടില്ല എന്നായിരുന്നു റിവേരയുടെ മകന്റെ മൊഴി. 2009 മുതൽ 2015 വരെ ഫോക്‌സിൽ സംപ്രേക്ഷണം ചെയ്ത മ്യൂസിക്കൽ-കോമഡി ഗ്ലീയിൽ ചിയർ‌ലീഡറായി റിവേര അഭിനയിച്ചിരുന്നു. പരമ്പരയിലെ 113 എപ്പിസോഡുകളിൽ റിവേര പ്രത്യക്ഷപ്പെട്ടു. നടൻ റയാൻ ഡോർസേയായിരുന്നു റിവേരയുടെ ഭർത്താവ്. 2018 ൽ ഇവർ വേർപിരിയുകയായിരുന്നു.