കൊച്ചി: നടപ്പു സാമ്പത്തിക വർഷത്തെ (2020-21)​ വർഷത്തെ ആദ്യപാദമായ ഏപ്രിൽ-ജൂണിൽ ഫെഡറൽ ബാങ്ക് 400.77 കോടി രൂപയുടെ ലാഭം രേഖപ്പെടുത്തി. മുൻവർഷത്തെ സമാനപാദത്തിൽ ലാഭം 384.21 കോടി രൂപയായിരുന്നു. അറ്റ പലിശ വരുമാനം മുൻവർഷത്തെ സമാനപാദത്തിലെ 1,​154.18 കോടി രൂപയിൽ നിന്ന് 12.33 ശതമാനം ഉയർന്ന് 1,​296.44 കോടി രൂപയായി; ഇതു റെക്കാഡാണ്. പ്രവർത്തനലാഭം 19.11 ശതമാനം ഉയർന്ന് 932.38 കോടി രൂപയിലെത്തി.

കൊവിഡ്-19 വെല്ലുവിളികൾക്കിടയിലും മികച്ച പ്രവർത്തനം കാഴ്‌ചവയ്ക്കാൻ ബാങ്കിന് കഴിഞ്ഞുവെന്ന് മാനേജിംഗ് ഡയറക്‌ടറും സി.ഇ.ഒയുമായ ശ്യാം ശ്രീനിവാസൻ പറഞ്ഞു. മൊത്തം നിഷ്‌ക്രിയ ആസ‌്തി (ജി.എൻ.പി.എ)​ 2.99 ശതമാനത്തിൽ നിന്ന് 2.96 ശതമാനത്തിലേക്കും അറ്റ നിഷ്‌ക്രിയ ആസ്‌തി (എൻ.എൻ.പി.എ)​ 1.49 ശതമാനത്തിൽ നിന്ന് 20 പാദങ്ങളിലെ ഏറ്രവും താഴ്‌ചയായ 1.22 ശതമാനത്തിലേക്കും എത്തിയത് ബാങ്കിന് നേട്ടമായി. ബാങ്കിന്റെ മൊത്തം ബിസിനസ് 12.95 ശതമാനം വർദ്ധിച്ച് 2.76 ലക്ഷം കോടി രൂപയായി. നിക്ഷേപം 16.90 ശതമാനവും വായ്പകൾ 8.27 ശതമാനവും ഉയർന്നു. സ്വർണവായ്പയിൽ വർദ്ധന 36.19 ശതമാനമാണ്.