ന്യൂഡൽഹി: രാജ്യത്ത് ഇത് വരെ റിപ്പോർട്ട് ചെയ്ത കൊവിഡ് കേസുകൾ പത്ത് ലക്ഷം കടന്നു. മഹാരാഷ്‌ട്ര, തമിഴ്നാട്, ഉത്തർ പ്രദേശ് തുടങ്ങിയ സംസ്ഥാനങ്ങളിൽ ദിനംപ്രതി കൊവിഡ് കേസുകൾ വർദ്ധിച്ചു വരികയാണ്. കഴിഞ്ഞ ദിവസത്തെ കണക്കു പ്രകാരം 9,68,876 കേസുകളാണ് ഇന്ത്യയിൽ റിപ്പോർട്ട് ചെയ്തിരുന്നത്. നിലവിൽ 3,31,146 രോഗികളാണ് രാജ്യത്ത് ചികിത്സയിലുളളത്. 6,12,815 പേർ രോഗമുക്തി നേടി.അതേസമയം 24,915 പേരാണ് രാജ്യത്ത് ഇതുവരെ കൊവിഡ് ബാധിച്ച് മരിച്ചത്.

രാജ്യത്ത് ഏറ്റവും കൂടുതൽ കൊവിഡ് കേസുകൾ റിപ്പോർട്ട് ചെയ്തിട്ടുളളത് മുംബയിലാണ്. വിവിധ സംസ്ഥാന സർക്കാരുകളുടെ ആരോഗ്യ വകുപ്പുകളിലായ് മാത്രം കഴിഞ്ഞ നാല് ദിവസത്തിനുള്ളിൽ ഒരു ലക്ഷത്തിലധികം പുതിയ കൊവിഡ് കേസുകളാണ് രേഖപ്പെടുത്തിയത്. 8641 പുതിയ കേസുകളാണ് മഹാരാഷ്‌ട്രയിൽ കഴിഞ്ഞ ദിവസം റിപ്പോർട്ട് ചെയ്തത്.സമ്പർക്കത്തിലൂടെ രോഗം സ്ഥിരീകരിച്ചവരുടെ കൂട്ടത്തിൽ രണ്ടാം സ്ഥാനത്തുളളത് തമിഴ്നാടാണ്. 46,714 രോഗികളാണ് ഇവിടെ ചികിത്സയിലുളളത്.അതേസമയം ഉത്തർ പ്രദേശിൽ 24 മണിക്കൂറിനുളളിൽ 2061 പുതിയ കൊവിഡ് കേസുകൾ കണ്ടെത്തിയതായി ആരോഗ്യ വകുപ്പ് അറിയിച്ചു. നിലവിൽ 43,444 പേരാണ് ഇവിടെ ചികിത്സയിലുളളത്. ആന്ധ്രയിൽ 2593 കേസുകളും പശ്ചിമ ബംഗാളിൽ 1690 കേസുകളും ഡൽഹിയിൽ 1652 കേസുകളും റിപ്പോർട്ട് ചെയ്തു. ഗുജറാത്തിൽ 919 കേസുകളും ബീഹാറിൽ 1385 കേസുകളും ജമ്മു കശ്മീരിൽ 493 കേസുകളും റിപ്പോർട്ട് ചെയ്തു.പഞ്ചാബിൽ പുതിയ 298 കേസുകളും , പുതുച്ചേരി 147, ഒഡീഷ 494, അരുണാചൽ പ്രദേശ് 29, ഹിമാചൽ പ്രദേശ് 13, രാജസ്ഥാൻ 737, ഗോവ 157, ഉത്തരാഖണ്ഡ് 199, ചണ്ഡിഗഢ് 16 , മധ്യപ്രദേശ് 735 എന്നിങ്ങനെയാണ് പുതിയ കേസുകൾ.

നിലവിൽ കൊവിഡ് 19 ഏറ്റവും കൂടുതൽ ബാധിച്ച മൂന്നാമത്തെ രാജ്യമാണ് ഇന്ത്യ, 35,33,317 പേർക്ക് രോഗം ബാധിച്ച യുഎസ് ആണ് മുന്നിൽ , രണ്ടാമത് 19,66,748 കേസുകൾ സ്ഥിരീകരിച്ച ബ്രസീലാണുളളത്. കൊവിഡ് വ്യാപനം രൂക്ഷമാകുന്ന സാഹചര്യത്തിൽ നിരവധി രാജ്യങ്ങൾ വീണ്ടും ലോക്ക് ഡൗൺ നടപ്പാക്കാൻ ഒരുങ്ങുകയാണ്.