കോഴിക്കോട്: സ്വർണക്കടത്ത് കേസിൽ പങ്കാളിയെന്ന് സംശയിക്കുന്ന കൊടുവള്ളി സ്വദേശിയായ ജൂവലറിയുടമയെ ഇന്ന് ചോദ്യം ചെയ്യും. മലബാറിലെ പ്രധാന സ്വർണ വ്യാപാരമേഖലയായ കൊടുവള്ളിയിലെ ജൂവലറികൾ കേന്ദ്രീകരിച്ചും ഉടൻ റെയ്‌ഡ് ഉണ്ടാകുമെന്നാണ് വിവരം. കൊടുവള്ളി സ്വദേശിയായ ജൂവലറി ഉടമയ്ക്ക് സ്വർണക്കടത്തിൽ പങ്കുണ്ടെന്ന രേഖകൾ അന്വേഷണ സംഘത്തിന് ലഭിച്ചതായാണ് വിവരം. ഇയാളാണ് സ്വർണം ഉരുക്കി ആഭരണങ്ങളാക്കി മാറ്റാൻ സഹായം നൽകുന്നത്. നടുവണ്ണൂർ സ്വദേശിയായ ഒരാൾ ഇതിന്റെ ഇടനിലക്കാരനായും പ്രവർത്തിക്കുന്നുണ്ട്. ഇയാൾ ഒളിവിലാണെന്നാണ് സൂചന.

ഇന്നലെ ആത്‌മഹത്യ ശ്രമം നടത്തിയ കോൺസൽ ജനറലിന്റെ ഗൺമാൻ ജയഘോഷ് അപകടനില തരണം ചെയ്തു. കയ്യിൽ രണ്ട് മുറിവുകളുണ്ട്. ഇതിൽ ഒരു മുറിവ് ആഴത്തിലുള്ളതാണ്. ബ്ളേഡ് വിഴുങ്ങിയെന്ന് ജയഘോഷ് പറഞ്ഞത് നുണയാണെന്നാണ് ഡോക്ടർമാർ പൊലീസിനെ അറിയിച്ചിരിക്കുന്നത്. ജയഘോഷിന്റെയും അടുത്ത ബന്ധുക്കളുടെയും ബാങ്ക് അക്കൗണ്ടുകളുടെ വിവരം തേടി കസ്റ്റംസ് അന്വേഷണം തുടങ്ങിയിട്ടുണ്ട്.