കൊച്ചി: ഇന്ത്യയിലേക്കുള്ള സ്വർണം ഇറക്കുമതി നടപ്പു സാമ്പത്തിക വർഷത്തെ (2020-21)​ ആദ്യപാദമായ ഏപ്രിൽ-ജൂണിൽ നേരിട്ടത് 94 ശതമാനം ഇടിവ്. 68.8 കോടി ഡോളറിന്റെ (ഏകദേശം 5,​152 കോടി രൂപ)​ സ്വർണമാണ് കഴിഞ്ഞപാദത്തിൽ ഇന്ത്യ വാങ്ങിയത്. റെക്കാഡ് വിലക്കയറ്റവും കൊവിഡ് നിയന്ത്രണങ്ങളും ഇറക്കുമതിയെ ബാധിച്ചു.

2019-20ലെ സമാനപാദത്തിൽ ഇറക്കുമതി 1,​150 കോടി ഡോളറിന്റേത് (86,​132 കോടി രൂപ)​ ആയിരുന്നു. വെള്ളി ഇറക്കുമതി 45 ശതമാനം താഴ്‌ന്ന് 57.5 കോടി ഡോളറിലൊതുങ്ങി (4,​500 കോടി രൂപ)​. സ്വർണം,​ വെള്ളി ഇറക്കുമതി താഴ്‌ന്നത് ഏപ്രിൽ-ജൂണിൽ വ്യാപാരക്കമ്മി 912 കോടി ഡോളറായി താഴാൻ സഹായിച്ചു. ഇറക്കുമതിച്ചെലവും കയറ്രുമതി വരുമാനവും തമ്മിലെ അന്തരമായ വ്യാപാരക്കമ്മി 2019ലെ സമാനപാദത്തിൽ 4,​596 കോടി ഡോളറായിരുന്നു.

കമ്മിഭാരം താഴേക്ക്

സ്വർണ ഇറക്കുമതിയിൽ ഏതാനും മാസങ്ങളായുള്ള ഇടിവ്,​ കറന്റ് അക്കൗണ്ട് കമ്മി ഒഴിവാക്കാനും ഇന്ത്യയ്ക്ക് സഹായകമായി. ജനുവരി-മാർച്ചിൽ ഇന്ത്യ കുറിച്ചത് ജി.ഡി.പിയുടെ 0.1 ശതമാനം കറന്റ് അക്കൗണ്ട് സർപ്ളസാണ് (60 കോടി ഡോളർ)​. 2019ലെ സമാനപാദത്തിൽ ജി.ഡി.പിയുടെ 0.7 ശതമാനം കറന്റ് അക്കൗണ്ട് കമ്മിയാണ് ഉണ്ടായിരുന്നത്. വിദേശ നാണയ വരുമാനവും ചെലവും തമ്മിലെ അന്തരമാണ് കറന്റ് അക്കൗണ്ട് കമ്മി/മിച്ചം.

ഇടിയുന്ന തിളക്കം

(സ്വർണം ഇറക്കുമതിയിലെ ഇടിവ്)​

മാർച്ച് : 62.6%

ഏപ്രിൽ : 99.93%

മേയ് : 98.4%

ജൂൺ : 77.5%