കൊച്ചി: ഡിജിറ്റൽ പേമെന്റുകൾ വർദ്ധിച്ചെങ്കിലും ഇന്ത്യയിൽ കറൻസി നോട്ടുകൾക്ക് പ്രിയം കുറയുന്നില്ല. കൊവിഡ് ഭീതിമൂലം ആളുകൾ എ.ടി.എം ഉപയോഗം കുറയ്ക്കുകയും ഡിജിറ്റൽ ഇടപാടുകളെ ആശ്രയിക്കുകയും ചെയ്‌തിട്ടും കറൻസി പ്രചാരം കുറഞ്ഞില്ലെന്ന് റിസർവ് ബാങ്ക് വ്യക്തമാക്കി.

2020-21 സാമ്പത്തിക വർഷം ജൂലായ് 10 വരെയുള്ള റിപ്പോർട്ട് പ്രകാരം പ്രചാരം ചെയ്യപ്പെട്ട കറൻസികളുടെ മൂല്യം 2.31 ലക്ഷം കോടി രൂപയാണ്. കഴിഞ്ഞ സാമ്പത്തിക വർഷത്തെ (2019-20)​ സമാനപാദത്തേക്കാൾ മൂന്നു മടങ്ങ് കൂടുതലാണിത്. അതേസമയം,​ ജൂണിൽ യു.പി.ഐ പേമെന്റുകളുടെ എണ്ണം മേയിലെ 123 കോടിയിൽ നിന്ന് 134 കോടിയിലേക്ക് ഉയരുകയും ചെയ്‌തു. ഒമ്പത് ശതമാനമാണ് വർദ്ധന. ഏപ്രിലിൽ കർശന ലോക്ക്ഡൗൺ നിയന്ത്രണങ്ങളെ തുടർന്ന് യു.പി.ഐ ഇടപാടുകൾ 99.9 കോടിയായി കുറഞ്ഞിരുന്നു.

മൂല്യം കണക്കാക്കിയാൽ,​ ജൂണിലെ യു.പി.ഐ ഇടപാടുകൾ മേയ് മാസത്തേക്കാൾ 19 ശതമാനം വർദ്ധിച്ച് 2.62 ലക്ഷം കോടി രൂപയായി. മേയിൽ 2.18 ലക്ഷം കോടി രൂപയായിരുന്നു. 2019 ജനുവരി-ഡിസംബറിൽ കറൻസി വിനിമയം 2.40 ലക്ഷം കോടി രൂപയായിരുന്നു. എന്നാൽ,​ 2020 ജനുവരി-മേയിൽ മാത്രം 2.66 ലക്ഷം കോടി രൂപയുടെ കറൻസികൾ വിനിമയം ചെയ്യപ്പെട്ടു. കൊവിഡ് ഭീതി ഒഴിയുന്നതോടെ,​ ജനങ്ങൾ വീണ്ടും എ.ടി.എമ്മുകളെ ആശ്രയിക്കുമെന്നും ഇത് കറൻസി വിനിമയം കൂടുതൽ ഉയരാൻ വഴിയൊരുക്കുമെന്നും റിസർവ് ബാങ്ക് പുറത്തിറക്കിയ 'മോഡലിംഗ് ആൻഡ് ഫോർകാസ്‌റ്രിംഗ് കറൻസി ഡിമാൻഡ് ഇൻ ഇന്ത്യ : എ ഹെറ്രറോഡോക്‌സ് അപ്രോച്ച്" എന്ന റിപ്പോർട്ട് സൂചിപ്പിച്ചു.

ജി.ഡി.പി വളർച്ചയും കറൻസി വിനിമയവും തമ്മിൽ ബന്ധമൊന്നുമില്ലെന്നും റിപ്പോർട്ടിലുണ്ട്. കൊവിഡും ലോക്ക്ഡൗണും മൂലം കഴിഞ്ഞപാദത്തിൽ ഇന്ത്യയുടെ ജി.ഡി.പി വളർച്ച നെഗറ്രീവ് തലത്തിലേക്ക് ഇടിഞ്ഞിരിക്കാമെന്നാണ് വിലയിരുത്തൽ. എന്നാൽ,​ കണക്കുകൾ പ്രകാരം കഴിഞ്ഞപാദത്തിൽ കറൻസി വിനിമയം കൂടുകയാണുണ്ടായത്.

എഫ്.പി.ഐ: നഷ്‌ടം

₹9,​015 കോടി

രാജ്യത്ത് കൊവിഡ് കൂടുതൽ ആശങ്ക സൃഷ്‌ടിക്കുന്നത് വിദേശ നിക്ഷേപത്തെയും ബാധിക്കുന്നു. ജൂലായിൽ ഇതുവരെ ഓഹരി-കടപ്പത്ര വിപണിയിൽ നിന്ന് വിദേശ പോർട്ട്‌ഫോളിയോ നിക്ഷേപകർ (എഫ്.പി.ഐ)​ പിൻവലിച്ചത് 9,​015 കോടി രൂപയാണ്. ഇതിൽ 6,058 കോടി രൂപയും കൊഴിഞ്ഞത് ഓഹരികളിൽ നിന്നാണ്. ജൂണിൽ 24,​053 കോടി രൂപയുടെ നഷ്‌ടം മൂലധന വിപണി കുറിച്ചിരുന്നു.