സ്വർണക്കടത്തും നയതന്ത്ര ബാഗേജും എൻഐഎയുമെല്ലാമായി ആകെ കോലാഹലമയമാണ് നമ്മുടെ കൊച്ചുകേരളത്തിലെ വാർത്താലോകം. ഇവിടുത്തെ പോലെ തന്നെ സ്വർണവുമായി ബന്ധമുള‌ള ഒരു വാർത്ത ഒഡീഷയിൽ നിന്നും കേൾക്കുന്നുണ്ട്. കള‌ളക്കടത്തും രാജ്യദ്രോഹവുമൊന്നുമല്ല കേട്ടോ ഒരു കുഞ്ഞ് ആമയുടെ കാര്യമാണ്. സ്വർണ നിറത്തിനോടടുത്ത് തിളങ്ങുന്ന മഞ്ഞ നിറമുള‌ള ഈ ആമയെ കണ്ടെത്തിയത് ഒഡീഷയിലെ ബാലാസോർ ജില്ലയിലെ കുറച്ച് ഗ്രാമീണരാണ്. അവരതിനെ വനംവകുപ്പിന് കൈമാറി.
താൻ ഇത്തരത്തിൽ ഒരു ആമയെ ഇതിനുമുൻപ് കണ്ടിട്ടില്ലെന്നാണ് വനംവകുപ്പ് വാർഡനായ ബി ആചാര്യ പറയുന്നത്. ഐഎഫ്എസ് ഉദ്യോഗസ്ഥനായ സുശാന്ത നന്ദ തന്റെ ട്വി‌റ്റർ അക്കൗണ്ടിൽ ഈ ആമയുടെ വീഡിയോ പോസ്‌റ്റ് ചെയ്‌തിട്ടുണ്ട്. ഭംഗിയുള‌ള ഈ ആമുടെ വീഡിയോ ഇതുവരെ 7000ലധികം പേർ കണ്ടുകഴിഞ്ഞു.
A rare yellow turtle was spotted & rescued in Balasore, Odisha yesterday.
Most probably it was an albino. One such aberration was recorded by locals in Sindh few years back. pic.twitter.com/ZHAN8bVccU— Susanta Nanda IFS (@susantananda3) July 20, 2020
'മിക്കവാറും ആൽബിനിസം ഉള‌ള ആമയാകാം ഇത്. മുൻപ് സിന്ധിൽ കുറച്ച്നാൾ മുൻപ് ഇത്തരത്തിൽ ഒരാമയെ കണ്ടെത്തിയിട്ടുണ്ട്.' എന്നും അദ്ദേഹം പോസ്‌റ്റിൽ കുറിക്കുന്നുണ്ട്. ആൽബിനിസമുള‌ള ഒരു കടുവയെ ഈയിടെ കണ്ടെത്തി. സ്വർണ കടുവ എന്ന പേരിലാണ് ഇത് വാർത്താ പ്രാധാന്യം നേടിയത്. കാസിരംഗ വനത്തിലായിരുന്നു കടുവയെ കണ്ടത്. 'ഇന്ത്യൻ ഫ്ളാപ് ഷെൽ ടർട്ടിൽ' എന്നറിയപ്പെടുന്ന ആമയാണിത് എന്ന് പോസ്‌റ്റ് കണ്ട മറ്റൊരാൾ പറയുന്നു. പതിനായിരത്തിൽ ഒരെണ‌ണത്തിന് ഇങ്ങനെ അൽബിനിസം വരാമത്രെ.എന്തായാലും ഈ സുന്ദരൻ ആമ സമൂഹമാദ്ധ്യമങ്ങളിൽ കൗതുകമാകുകയാണ്.