ഇസ്​ലാമാബാദ്​: ഇടുങ്ങിയ കൂടിനോടും കാലുകളിലെ ചങ്ങലയോടും വിടപറയാൻ ഒരുങ്ങി ‘കാവൻ’. ഇസ്​ലാമാബാദിലെ കാഴ്​ചബംഗ്ലാവിലെ ഒറ്റപ്പെട്ട ജീവിതം അവസാനിപ്പിച്ച്​ ‘കാവൻ’ എന്ന ആന അധികം വൈകാതെ കംബോഡിയയിലെ വന്യജീവി സ​ങ്കേതത്തിലേക്ക്​ എത്തും. ഇസ്​ലാമാബാദിലെ ചെറിയ കാഴ്​ചബംഗ്ലാവിൽ ദുരിതമനുഭവിക്കുന്ന ആനയുടെ പ്രയാസം ലോകമെങ്ങുമുള്ള മൃഗസ്​നേഹികൾ കാമ്പയിനാക്കി മാറ്റിയിരുന്നു. ആക്​ടിവിസ്​റ്റുകൾ നൽകിയ ഹർജിയിൽ ആനയെ കംബോഡിയയിലേക്ക്​ മാറ്റാൻ ഇസ്​ലാമാബാദ്​ ഹൈക്കോടതി ഉത്തരവിട്ടു. 25,000 ഏക്കറുള്ള കംബോഡിയയിലെ വന്യജീവി സങ്കേതത്തിൽ ഇതിനകം 80ലധികം ആനകളെ പുനരധിവസിപ്പിച്ചിട്ടുണ്ട്​. കോടതി ഉത്തരവ്​ അംഗീകരിക്കുമെന്നും ആനയെ മാറ്റുമെന്നും പാക് കാലാവസ്ഥാ വ്യതിയാന മന്ത്രി മിയാൻ അസ്​ലം അമിൻ പറഞ്ഞു. എന്നാണ്​ കംബോഡിയയിലേക്ക്​ കൊണ്ടുപോകുകയെന്ന്​ വ്യക്​തമാക്കിയില്ല. കൂട്ടുണ്ടായിരുന്ന പിടിയാന 2012ൽ ചരിഞ്ഞതിനെ തുടർന്നാണ്​ ‘കാവൻ’ അക്രമാസക്​തനാകുന്നതെന്നും അല്ലാതെ തങ്ങൾ പീഡിപ്പിച്ചതല്ലെന്നുമാണ്​ കാഴ്​ചബംഗ്ലാവ്​ അധികൃതർ നൽകുന്ന വിശദീകരണം​.

കാവൻ,​ ശ്രീലങ്കയുടെ സമ്മാനം

1985ൽ ശ്രീലങ്ക സമ്മാനമായി നൽകിയ ‘കാവൻ’ ഇസ്​ലാമാബാദ്​ കാഴ്​ചബംഗ്ലാവിൽ കുട്ടികൾ അടക്കമുള്ളവരുടെ പ്രധാന ആകർഷണമായിരുന്നു.