ലണ്ടന്‍: ഒമ്പത് കോടി ഡോസ് കൊവിഡ് വാക്സിൻ വാങ്ങാൻ ബ്രിട്ടൻ ഗവേഷണ സ്ഥാപനങ്ങളുമായി കരാർ ഒപ്പുവച്ചു. വാക്സിൻ ഗവേഷണം നടത്തുന്ന ഫൈനസർ ഇൻകോർപറേഷൻ, ബയോ എൻടെക് അലയൻസ്, ഫ്രഞ്ച് കമ്പനിയായ വൽനെവ എന്നിവയുമായാണ് ബ്രിട്ടീഷ് സർക്കാ‌ർ കരാറിലെത്തിയത്. ബ്രിട്ടീഷ് വാണിജ്യ മന്ത്രാലയമാണ് കരാർ വിവരങ്ങൾ വെളിപ്പെടുത്തിയത്. ബയോ എൻടെക്കും ഫൈസറും ചേർന്ന് വികസിപ്പിക്കുന്ന വാക്സിൻ മൂന്ന് കോടി ഡോസാണ് ബ്രിട്ടൻ വാങ്ങുന്നത്. വൽനെവയുടെ വാക്സിൻ ആറ് കോടി ഡോസും വാങ്ങും.
വാക്സിൻ സുരക്ഷിതവും അനുയോജ്യവുമാണെന്ന് തെളിയിക്കപ്പെട്ടാൽ നാല് കോടി ഡോസ് കൂടി വാങ്ങും. എത്ര തുകയ്ക്കാണ് കരാർ ഒപ്പുവച്ചതെന്ന് മന്ത്രാലയം വെളിപ്പെടുത്തിയിട്ടില്ല. നേരത്തെ 10 കോടി ഡോസ് വാക്സിൻ നിർമ്മിക്കാനായി ബ്രിട്ടീഷ് സർക്കാർ അസ്ട്രസനെക കമ്പനിയുമായി കരാറിലെത്തിയിരുന്നു. ഓക്സ്ഫോഡ് യൂണിവേഴ്‍സിറ്റിയുമായി ചേർന്നാണ് അസ്ട്രസനെക വാക്സിൻ വികസിപ്പിക്കുന്നത്.