തിരുവനന്തപുരം: തിരുവനന്തപുരത്ത് കീം പരീക്ഷ (എന്‍ജിനിയറിംഗ്/ഫാര്‍മസി പ്രവേശന പരീക്ഷ) എഴുതിയ രണ്ടു വിദ്യാർത്ഥികൾക്ക് കൊവിഡ് സ്ഥിരീകരിച്ചു. തൈക്കാട് കേന്ദ്രത്തിൽ പരീക്ഷ എഴുതിയ പൊഴിയൂർ സ്വദേശിക്കും കരമനയിൽ പരീക്ഷ എഴുതിയ കരകുളം സ്വദേശിക്കുമാണ് രോഗം സ്ഥിരീകരിച്ചത്.

കരകുളം സ്വദേശിക്ക് നേരത്തെ രോഗ ലക്ഷണം ഉണ്ടായിരുന്നതിനാൽ പ്രത്യേക മുറിയിലാണ് പരീക്ഷ എഴുതിയതെന്നാണ് വിവരം. പൊഴിയൂർ സ്വദേശിക്കൊപ്പം പരീക്ഷ വിദ്യാർത്ഥികളുടെ പട്ടിക പ്രവേശന പരീക്ഷാ കമ്മിഷണർ ആരോഗ്യവകുപ്പിന് കൈമാറി.

തിരുവനന്തപുരത്ത് കൊവിഡ് രോ​ഗികളുടെ എണ്ണം വർദ്ധിക്കുകയാണ്. സംസ്ഥാനത്ത് കഴിഞ്ഞ ഒരാഴ്ചക്കിടെ കൊവിഡ് ബാധിതരായ 5401 പേരിൽ 3497 പേരും സമ്പർക്ക രോഗികളാണ്. 260 പേരുടെ ഉറവിടം വ്യക്തമല്ലെന്നത് പൂന്തുറയ്ക്കും പുല്ലുവിളയ്ക്കും പുറമേ സംസ്ഥാനത്തെ മറ്റ് ചില പ്രദേശങ്ങളിലും സമൂഹവ്യാപന സാദ്ധ്യതയിലേക്ക് വിരൽ ചൂണ്ടുന്നു. തിരുവനന്തപുരത്തിനു പുറമേ കൊല്ലം, എറണാകുളം, കോഴിക്കോട് ജില്ലകളിലും രോഗബാധ കുതിക്കുകയാണ്.