കൊച്ചി: ആഭരണപ്രിയരെ ആശങ്കയിലാഴ്‌ത്തി സ്വർണവില റെക്കാഡ് മുന്നേറ്റം തുടരുന്നു. സംസ്ഥാനത്ത് പവൻ വില ഇന്നലെ 160 രൂപ വർദ്ധിച്ച് 36,​760 രൂപയായി. 20 രൂപ വർദ്ധിച്ച് 4,595 രൂപയാണ് ഗ്രാം വില. ശമനമില്ലാതെ വ്യാപിക്കുന്ന കൊവിഡ് ഭീതി,​ ആഗോളതലത്തിൽ സമ്പദ്‌വ്യവസ്ഥയെ തളർത്തുന്നതിനാൽ നിക്ഷേപകർ സുരക്ഷിതതാവളമായി കണ്ട് സ്വർണത്തിലേക്ക് ചേക്കേറുന്നതാണ് വിലക്കയറ്റത്തിന് കാരണം.

രാജ്യന്തരവില ഇന്നലെ ഔൺസിന് 1,​820 ഡോളർവരെ ഉയർന്നു. 2011 സെപ്‌തംബറിന് ശേഷമുള്ള ഏറ്രവും ഉയർന്ന വിലയാണിത്. വില വൈകാതെ 1,​830-1,​850 ഡോളർ നിരക്കിലേക്ക് എത്തുമെന്നാണ് വിലയിരുത്തലുകൾ. അങ്ങനെയെങ്കിൽ,​ കേരളത്തിൽ പവൻ വില 38,​000 രൂപവരെ എത്താം. ആഭരണങ്ങളല്ല,​ ഗോൾഡ് എക്‌സ്‌ചേഞ്ച് ട്രേഡഡ് ഫണ്ടുകളാണ് (ഗോൾഡ് ഇ.ടി.എഫ്)​ നിക്ഷേപം വാരിക്കൂട്ടുന്നത്. ലോകത്തെ ഏറ്രവും വലിയ ഗോൾഡ് ഇ.ടി.എഫായ എസ്.പി.ഡി.ആർ ഗോൾഡ് ട്രസ്‌‌റ്റിലെ നിക്ഷേപം ഇന്നലെ 0.4 ശതമാനം ഉയർന്ന് 1,​211.86 ടണ്ണിലെത്തി.

₹36,​760

പവൻ വില ഇന്നലെ 160 രൂപ വർദ്ധിച്ച് 36,​760 രൂപയായി.

₹4,​595

ഗ്രാമിന് 20 രൂപ ഉയർന്ന് 4,​595 രൂപ.

₹7,​760

ഈവർഷം ഇതുവരെ പവന് കൂടിയത് 7,​760 രൂപ. ഗ്രാമിന് 970 രൂപ.

₹40,​000

മൂന്നു ശതമാനം ജി.എസ്.ടി.,​ 0.25 ശതമാനം സെസ്,​ കുറഞ്ഞത് അഞ്ച് ശതമാനം പണിക്കൂലി എന്നിവ കൂടിച്ചേർത്താൽ കേരളത്തിൽ ഒരു പവൻ ആഭരണം വാങ്ങാൻ 40,​000 രൂപയെങ്കിലും നൽകണം.