ആലുവ:കൊവിഡ് മാനദണ്ഡം പാലിക്കാതെ സംസ്കാര ചടങ്ങ് നടത്തിയ 45 പേർക്കെതിരെ കേസെടുത്തു. ആലുവയിലാണ് സംഭവം. തോട്ടക്കാട്ടുകരയിൽ വൃദ്ധയുടെ സംസ്കാരത്തിൽ പങ്കെടുത്ത കണ്ടാലറിയാവുന്ന 45പേർക്കെതിരെയാണ് ആലുവാ പൊലീസ് കേസെടുത്തത്. ചടങ്ങിൽ ഇരുന്നൂറിലേറെ പേർ പങ്കെടുത്തുവെന്നാണ് റിപ്പോർട്ട്.

വൃദ്ധയുടെ രണ്ട് ബന്ധുക്കൾക്ക് നേരത്തെ കൊവിഡ് സ്ഥിരീകരിച്ചിരുന്നു. കിടപ്പുരോഗിയായിരുന്ന വൃദ്ധ മരിക്കുമ്പോൾ പനിയടക്കമുള്ള അസുഖങ്ങളും ഉണ്ടായിരുന്നു. എന്നിട്ടും കൊവിഡ് പരിശോധന നടത്താതെ മൃതദേഹം സംസ്കരിക്കുകയായിരുന്നു. അന്വേഷണം തുടരുകയാണെന്നും കൂടുതൽ പേർക്കെതിരെ കേസെടുക്കുമെന്നുമാണ് റിപ്പോർട്ട്.