ചെന്നൈ: ലൈഫ് ഇൻഷ്വറൻസ് കോർപ്പറേഷൻ ഒഫ് ഇന്ത്യയും യൂണിയൻ ബാങ്കും കോർപ്പറേറ്ര് ഏജൻസി സഹകരണത്തിന് ധരണയായി. ഇതോടെ,​ എൽ.ഐ.സിയുടെ വിവിധ പ്ളാനുകൾ ഇനി യൂണിയൻ ബാങ്കിന്റെ ശാഖകളിലൂടെയും നേടാം. കേരളത്തിലും തമിഴ്നാട്ടിലുമായി 1,​021 ശാഖകൾ ബാങ്കിനുണ്ട്.

യൂണിയൻ ബാങ്ക് ഫീൽഡ് ജനറൽ മാനേജർ എം.എച്ച്. പത്മനാഭൻ,​ റീജിയണൽ ഹെഡ് ബി.പി. ദാസ്,​ ഡി.ജി.എം ഇ. പുല്ല റാവു,​ എൽ.ഐ.സി ദക്ഷിണ മേഖലാ സോണൽ മാനേജർ കെ. കതിരേശൻ എന്നിവർ യൂണിയൻ ബാങ്ക് ഓഫീസിൽ നടന്ന ധാരണാപത്രം ഒപ്പുവയ്ക്കുന്ന ചടങ്ങിൽ സംബന്ധിച്ചു. എൽ.ഐ.സിയുടെ ടേം ഇൻഷ്വറൻസ്,​ പെൻഷൻ പ്ളാനുകൾ,​ ചിൽഡ്രൻ പ്ളാനുകൾ,​ യൂലിപ്,​ എൻഡോവ്‌മെന്റ് പ്ളാനുകൾ എന്നിവയാണ് യൂണിയൻ ബാങ്കിന്റെ ശാഖകളിലൂടെ ലഭ്യമാക്കുക.