ജയ്പൂർ: ബി.ജെ.പിയിൽ ചേരാൻ 35 കോടി വാഗ്ദ്ധാനം ചെയ്തുവെന്ന് തനിക്കെതിരെ ആരോപണമുന്നയിച്ച എം.എൽ.എയ്ക്ക് വക്കീൽ നോട്ടീസയച്ച് കോൺഗ്രസ് വിമതനും മുൻ പി.സി.സി പ്രസിഡന്റുമായ സച്ചിൻ പൈലറ്റ്. കോൺഗ്രസ് എം.എൽ.എ ഗിരിരാജ് സിങ് മലിംഗക്കെതിരെയാണ് സച്ചിൻ നോട്ടീസ് അയച്ചത്.

കഴിഞ്ഞ തിങ്കളാഴ്ചയാണ് ബി.ജെ.പിയിൽ ചേരാൻ സച്ചിൻ പൈലറ്റ് തനിക്ക് 35 കോടി വാഗ്ദ്ധാനം ചെയ്തതായി കോൺഗ്രസ് എം.എൽ.എ ആരോപണമുന്നയിച്ചത്. 2019 ഡിസംബർ മുതൽ തുടർച്ചയായി പൈലറ്റ് തന്നോട് ഇക്കാര്യം ആവശ്യപ്പെടുകയും ചർച്ച നടത്തുകയും ചെയ്തിരുന്നതായും, എന്നാൽ താൻ വാഗ്ദ്ധാനം നിരസിച്ചെന്നുമായിരുന്നു മലിംഗ മാദ്ധ്യമങ്ങളോട് പറഞ്ഞത്.

തനിക്കെതിരെയുള്ള ആരോപണം കഴിഞ്ഞ ദിവസം പൈലറ്റ് നിഷേധിച്ചിരുന്നു. ഇതിന് പിന്നാലെയാണ് വക്കീൽ നോട്ടീസ് അയച്ചിരിക്കുന്നത്. മലിംഗയുടെ തെറ്റായതും, അപകീർത്തികരവുമായ പ്രസ്താവനകൾക്ക് നോട്ടീസ് നൽകിയിട്ടുണ്ടെന്ന് പൈലറ്റുമായി അടുത്ത വൃത്തങ്ങൾ സ്ഥിരീകരിച്ചു.