ജക്കാർത്ത: പേരിന് മാത്രം തുണിയുടുത്തവർ. താമസം മരത്തിന് മുകളിലെ വീടുകളിൽ. ജീവനുള്ള എന്തിനെയും പച്ചയ്ക്ക് കഴിക്കും. ഏറെ ഇഷ്ടം മനുഷ്യമാംസം... കെട്ടുകഥയല്ല, ഇന്തോനേഷ്യയിലെ വെസ്റ്റ് പാപ്പുവ വനാന്തരങ്ങളിൽ താമസിക്കുന്ന കൊറോവായി ഗോത്ര വിഭാഗത്തിന്റെ രീതികളാണിത്. ലോകത്തിലെ ഏറ്റവും വ്യത്യസ്തമായ ആദിവാസിവിഭാഗമാണിവരെന്നാണ് റിപ്പോർട്ട്.

പുറത്തുനിന്നുള്ള, പ്രത്യേകിച്ച് വെളുത്ത മനുഷ്യർ പ്രേതങ്ങളാണെന്നാണ് കൊറോവായികളുടെ വിശ്വാസം. അതിനാൽ അത്തരക്കാരെ കൂട്ടമായി വേട്ടയാടി മാംസം പച്ചയ്ക്ക് കഴിക്കും. പതിനായിരം വർഷം പഴക്കമുള്ള ഇവരുടെ ആഭിചാര ക്രിയകളുടെ ഭാഗമാണിത്.

ഇറ്റാലിയൻ ഫോട്ടോജേർണലിസ്റ്റായി ഗിയാൻലുൻക ചിയോഡിനി നിരവധി ദിവസങ്ങൾ ചെലവഴിച്ചാണ് ദൂരൂഹതനിറഞ്ഞ കൊറോവായികളുടെ ജീവിതം കാമറയിൽ പകർത്തിയത്. ഇതിനായി അട്ടകടിയേറ്റും പാമ്പിനെപ്പോലെ ഇഴഞ്ഞും മഴക്കാടുകൾക്കിടയിൽ നിരവധി ദിവസങ്ങൾ ഗിയാൻലുൻക ചെലവഴിച്ചു.

കൈയിൽകിട്ടുന്നതെന്തും അത് പുഴുവായാലും പാറ്റയായാലും മനുഷ്യനായാലും പച്ചയ്ക്ക് തിന്നും. അസുഖങ്ങൾ വന്നാൽ പാരമ്പര്യ പച്ചമരുന്നുകൾ മാത്രം. ശരാശരി ആയുസ് 50 വർഷം.
ആഭിചാരക്രിയകളിൽ വിശ്വസിക്കുന്നതിനാൽ ഖഖുവ എന്ന പ്രേതത്തിൽ നിന്ന് കൂട്ടത്തിലുള്ളവരെ രക്ഷിക്കാനായി മന്ത്രതന്ത്ര വിദ്യകൾ പ്രയോഗിക്കാറുണ്ട്. ഖഖുവ വേഷംമാറിയാതാണെന്ന് തെറ്റിദ്ധരിച്ച് കൂട്ടത്തിലുള്ളവരെ കൊന്നു തിന്നാനും മടിക്കില്ല.

വാസം മരമുകളിൽ

ആകാശം മുട്ടെ ഉയരമുള്ള മരത്തിനു മുകളിൽ വീട് വച്ചാണ് ഇവരുടെ താമസം. 1970 വരെ പുറം ലോകത്തിന് അറിയാതെ കാടുകളിൽ അദൃശ്യരായാണ് ഇവർ കഴിഞ്ഞിരുന്നത്. സിവിൽ എൻജിനീയറിംഗ് വിദഗദ്ധരെപ്പോലും അമ്പരപ്പിക്കുന്ന തരത്തിലാണ് വീടുകളുടെ നിർമ്മാണം.
ആറുമുതൽ 12 മീറ്റർ വരെ ഉയരത്തിലാണ് സാധാരണ കൊറൊവായ് വീടുകൾ നിർമിക്കുന്നത്. ചിലതിന് തറ നിരപ്പിൽ നിന്നും 35 മീറ്റർ വരെ ഉയരമുണ്ടാകും. നല്ല ഉറപ്പുള്ള ഒരു

മരത്തിന്റെ മുകൾ ഭാഗം മുറിച്ച് നീക്കുന്നു. ഇതിന് മുകളിൽ ശിഖരം ഉപയോഗിച്ച് തറ നിർമിക്കും, അതിനുശേഷം സാഗോ പന ഉപയോഗിച്ച് തറ ഭാഗത്തിന്റെ മുകൾ ഭാഗം മോടിപിടിപ്പിക്കുന്നു. ചുമരും,മേൽക്കൂരയും ഇതേ പനയുടെ ഇല ഉപയോഗിച്ച് മറയ്ക്കുന്നു. മരത്തിന്റെ കോവണിയാണ് വീട്ടിലേയ്ക്ക് കയറാനുള്ള വഴി.

കൊതുകുകളിൽ നിന്നും വന്യമൃഗങ്ങളിൽ നിന്നും സംരക്ഷണം നേടാൻ മാത്രമല്ല ഈ വീടുകൾ. പ്രേത, പിശാചുക്കളിൽ നിന്നും, പുറംലോകത്തിന്റെ കണ്ണിൽപെടാതിരിക്കാനും ഈ വീടുകൾ കൊറൊവക്കാരെ സഹായിക്കുന്നു.വീടിന്റെ ഒരു ഭാഗം പുരുഷൻമാർക്കും മറ്റൊരു ഭാഗം സ്തീകൾക്കുമായാണ് ക്രമീകരിക്കുന്നത്.