മുംബയ്: കൊവിഡ് ഭീതിയെ തുടർന്ന് അനിശ്ചിതത്വത്തിലായ ക്രിക്കറ്റ് മാമാങ്കം ഐ പി എൽ സെപ്‌തംബർ 19ന് യു എ ഇയിൽ തുടങ്ങും. ഫൈനൽ നടത്തുക നവംബർ 8നായിരിക്കുമെന്നും ഐ പി എൽ ഗവേർണിംഗ് കൗൺസിൽ ചെയർമാൻ ബ്രിജേഷ് പട്ടേൽ അറിയിച്ചു. രാജ്യത്ത് കൊവിഡ് സ്ഥിതി രൂക്ഷമായിരിക്കുന്ന സാഹചര്യത്തിൽ ഇന്ത്യയിൽ വച്ച് കൊവിഡ് നടത്താനുള‌ള സാദ്ധ്യത മങ്ങി. ഇതോടെയാണ് ക്രിക്കറ്റ് മാമാങ്കത്തിന്റെ 13ആം എഡിഷന് യു എ ഇ വേദിയായി മാറിയത്.
മത്സര ക്രമങ്ങളെ കുറിച്ചും മറ്റ് വിവരങ്ങളും അടുത്തയാഴ്‌ച നടക്കുന്ന ഐ പി എൽ ഗവേർണിംഗ് കൗൺസിലിൽ തീരുമാനിക്കും. മാർച്ച് മാസം മുതൽ മേയ് വരെ നീണ്ടുനിൽക്കുന്ന 60 മത്സരങ്ങളടങ്ങിയ ഷെഡ്യൂളായിരുന്നു ആദ്യം തീരുമാനിച്ചത്. എന്നാൽ കൊവിഡ് രാജ്യത്ത് രൂക്ഷമായതോടെ ഐ പി എൽ നടത്തുന്ന കാര്യവും അനിശ്ചിതമായി നീളുകയായിരുന്നു.