ജൊഹനാസ്​ബർഗ്​: വർണവിവേചനത്തിനെതിരായ പോരാട്ടത്തി​ന്റെ ഭാഗമായി 26 വർഷം തടവറയിൽ കഴിഞ്ഞ ആൻഡ്രൂ മലാഞ്ചെനി(95)​ വിടവാങ്ങി. നെൽസൺ മണ്ടേലക്കൊപ്പം റോബൻ​ ​ഐലൻഡിൽ തടവിൽ കഴിഞ്ഞ മലാഞ്ചെനി കഴിഞ്ഞദിവസം പ്രിട്ടോറിയയി​ലെ ആശുപത്രിയിലാണ്​ മരിച്ചത്​.

1964ൽ റിവോനിയ വിചാരണയിൽ നെൽസ​ൺ മണ്ടേലയ്ക്കൊപ്പം ശിക്ഷിക്കപ്പെട്ടവരിൽ ജീവിച്ചിരുന്ന അവസാനത്തെ ആളായിരുന്നു മലാഞ്ചെനി. റിവോനിയ വിചാരണയിൽ മണ്ടേലയ്ക്കും മലാഞ്ചെനിയ്ക്കും പുറമെ, ആറു​പേർക്കു​ കൂടിയാണ്​ തടവ്​ വിധിച്ചത്​. മലാഞ്ചെനി 26 വർഷത്തെ തടവിനു​ ശേഷം 1989ൽ പുറത്തിറങ്ങിയപ്പോൾ മ​ണ്ടേല 1990ൽ 27 വർഷത്തെ തടവുജീവിതം കഴിഞ്ഞാണ്​ പുറംലോകം കണ്ടത്​. ഇവരുടെ തടവുജീവിതമാണ്​ അപാർതീഡിനെതിരെ ലോകതലത്തിൽ പോരാട്ടം ശക്തിപ്പെടാൻ കാരണമായത്​. ജയിലിൽ മണ്ടേല 466/ 64 നമ്പറും മലാഞ്ചെനി 467/ 64 നമ്പറും തടവുകാരായിരുന്നു.

♦ 1961ൽ വർണവിവേചനവിരുദ്ധ പോരാട്ടത്തി​ന്റെ ഭാഗമായി ചൈനയിൽ പരിശീലനത്തിനു​ പോയ മലാഞ്ചെനി അവിടെ വച്ച്​ മാവോ സേ തൂങ്ങിനെ കണ്ടത്​ ആത്മകഥയിൽ വിവരിച്ചിട്ടുണ്ട്​.

♦ 1962ൽ ദക്ഷിണാഫ്രിക്കയിൽ മടങ്ങിയെത്തിയ ശേഷം പോരാട്ടം തുടരുന്നതിനിടെയാണ്​ പിടിയിലായതും തടവിലായതും.
♦ മോചിതനായ ശേഷം ആഫ്രിക്കൻ നാഷണൽ കോൺഗ്രസി​ന്റെ നേതൃസ്ഥാനത്തോ സർക്കാറിന്റെയോ ഭാഗമാകാതിരുന്ന മലാഞ്ചെനി, നിർണായക സ്വാധീനം ചെലുത്തിയിരുന്നു.