ബാങ്കോക്ക്​: ആറുപതിറ്റാണ്ട് മുൻപ് ആറു കുട്ടികളെ കൊലപ്പെടുത്തിയ കേസിൽ വധശിക്ഷക്ക്​ വിധേയനായ തായ്​ലാൻഡിലെ ആദ്യ ‘സീരിയൽ കില്ലർ’ ഷി ഓയ്ക്ക്​ ഒടുവിൽ അന്ത്യവിശ്രമം. ഇത്രയും വർഷം ബാങ്കോംഗിലെ സിരിരാജ്​ ആശുപത്രിയിലെ ഫോറൻസിക്​ മ്യൂസിയത്തിൽ പ്രദർശനത്തിന് വച്ചിരുന്ന മൃതദേഹം ദിവസങ്ങൾ മുമ്പ്,​ ബുദ്ധമത വിശ്വാസ പ്രകാരം ഒൻപത് ബുദ്ധസന്യാസികൾ ചേർന്ന് അന്ത്യകർമ്മങ്ങൾ നിർവഹിച്ചു. ചൈനയിൽ നിന്ന്​ തായ്​ലൻഡിലേക്ക്​ കുടിയേറിയ ഷി ഒായിയെ കാട്ടിനുള്ളിൽ എട്ട്​ വയസുകാര​ന്റെ മൃതദേഹം കുഴിച്ചിടാനുള്ള ശ്രമത്തിനിടെ 1958ൽ പിടികൂടിയെന്നാണ്​ പൊലീസ്​ രേഖകളിലുള്ളത്. അന്വേഷണത്തിൽ അഞ്ച്​ കുട്ടികളെ കൂടി കൊലപ്പെടുത്തിയെന്ന്​ കണ്ടെത്തി. 1959 സെപ്​റ്റംബർ 16ന്​ 32ാം വയസിൽ ഇയാളെ വെടിവച്ചു കൊന്നു. സിരിരാജ്​ ആശുപത്രിക്ക്​ പഠനത്തിനായി കൈമാറിയ മൃതദേഹം ‘മമ്മി’ മാതൃകയിൽ പ്രദർശനവസ്​തുവായി. ഷി തന്നെയാണോ യഥാർത്ഥ കുറ്റവാളി എന്ന സംശയം കഴിഞ്ഞ പതിറ്റാണ്ടിൽ ഉയർന്നുവന്നു. ഷിയ്ക്ക് നീതി ലഭ്യമായില്ലെന്നും അന്ത്യകർമങ്ങളെങ്കിലും നൽകണമെന്നും ആവശ്യപ്പെട്ട്​ 2018ൽ കാമ്പയിൻ ആരംഭിച്ചു. ഇതോെടെ അന്ത്യകർമത്തിന്​ അവസരം ഒരുങ്ങി. ഷി നിരപരാധിയാണെന്ന്​ ഒപ്പം ജോലി ചെയ്തിരുന്ന ത​ന്റെ മാതാപിതാക്കൾ പറഞ്ഞിരുന്നതായി വന്നപ്പ തോംഗ്ചിൻ എന്ന സ്​ത്രീ പറഞ്ഞു. അന്നത്തെ സംഭവങ്ങൾക്ക് ഖേദം ​പ്രകടിപ്പിക്കാനേ കഴിയൂവെന്നും സംസ്​കാര ചടങ്ങിൽ പങ്കെടുത്ത ശേഷം അവർ വ്യക്തമാക്കി.