തിരുവനന്തപുരം: കൊവിഡ് വൈറസ് ബാധ സ്ഥിരീകരിക്കാനുള്ള ദ്രുതപരിശോധനയുടെ (ആന്റിജൻ ടെസ്റ്റ്) നിരക്ക് ഏകീകരിച്ച് സംസ്ഥാന സ‍ർക്കാ‍ർ. സ്വകാര്യ ലാബുകളിലെ ആന്റിജൻ പരിശോധനയ്ക്ക് 625 രൂപയാണ് സംസ്ഥാന സ‍ർക്കാർ നിശ്ചയിച്ചിരിക്കുന്നത്. നിലവിൽ ആന്റിജൻ പരിശോധനയ്ക്ക് പല സ്വകാര്യ ആശുപത്രികളും ലാബുകളും വ്യത്യസ്ത നിരക്കാണ് ഏ‍ർപ്പെടുത്തുന്നത്.

ആന്റിജൻ പരിശോധനയിൽ പോസീറ്റീവായാലും റിയൽ ടൈം പി.സ‍ി.ആ‍ർ ടെസ്റ്റ് നടത്തിയാണ് സംസ്ഥാനത്ത് കൊവിഡ് രോ​ഗബാധ ഔദ്യോ​ഗികമായി സ്ഥിരീകരിക്കുന്നത്. 48 മണിക്കൂറിനകം രണ്ട് തവണ ആ‍‍ർ.ടി- പി.സി.ആ‍ർ ടെസ്റ്റ് പോസിറ്റീവായാൽ മാത്രമേ കൊവിഡ് സ്ഥിരീകരിക്കൂ. നേരത്തെ കൊവിഡ് രോ​ഗിയെ ഡിസ്ചാ‍ർജ് ചെയ്യാനും രണ്ട് പി.സി.ആ‍ർ ടെസ്റ്റ് നടത്തിയിരുന്നുവെങ്കിലും ഇപ്പോൾ 14 ദിവസം കഴിഞ്ഞ് ഒരു ആന്റിജൻ ടെസ്റ്റ് മാത്രം നടത്തിയാണ് രോ​ഗമുക്തി ഉറപ്പിക്കുന്നത്.

നിലവിൽ സമൂഹവ്യാപനമുണ്ടായോ എന്നു തിരിച്ചറിയാനും ആശുപത്രികളിൽ രോ​ഗികളെ പ്രവേശിപ്പിക്കുന്നതിന് മുമ്പായും ആന്റിജൻ ടെസ്റ്റുകൾ നടത്തുന്നുണ്ട്. രണ്ട് മണിക്കൂറിനകം ഫലം അറിയാം എന്നതാണ് ആന്റിജൻ പരിശോധനയുടെ പ്രധാന നേട്ടം.