ന്യൂഡൽഹി: ഡൽഹി ഓൾ ഇന്ത്യ ഇൻസ്റ്റിറ്റ്യൂട്ട് ഒഫ് മെഡിക്കൽ സയൻസിൽ ( എയിംസ് ) ഇന്ന് ആരംഭിച്ച ഇന്ത്യ തദ്ദേശിയമായി വികസിപ്പിച്ചെടുത്ത ആദ്യ കൊവിഡ് 19 വാക്സിനായ കൊവാക്സിന്റെ മനുഷ്യരിലുള്ള ആദ്യഘട്ട ക്ലിനിക്കൽ ട്രയലിന്റെ ആദ്യ ഡോസ് പരീക്ഷിച്ചത് ഡൽഹി സ്വദേശിയായ 30 വയസുകാരനിൽ.

പൂർണ ആരോഗ്യവാനായ ഇദ്ദേഹത്തിന്റെ പരിശോധനകളെല്ലാം രണ്ട് ദിവസങ്ങൾക്ക് മുമ്പ് തന്നെ പൂർത്തിയാക്കിയിരുന്നു. ഉച്ചയ്ക്ക് 1.30നാണ് 0.5 മില്ലിലിറ്റർ കൊവാക്സിൻ കുത്തിവച്ചത്. ഇതേവരെ പാർശ്വഫലങ്ങളൊന്നും പ്രകടമായിട്ടില്ല. രണ്ട് മണിക്കൂർ സമയത്തേക്ക് ഇദ്ദേഹം പ്രത്യേക നിരീക്ഷണത്തിലായിരുന്നു. അടുത്ത ഏഴ് ദിവസത്തേക്ക് ഇദ്ദേഹത്തെ നിരീക്ഷിക്കും. പരിശോധനാ ഫലം വന്ന ശേഷം കുറച്ച് വോളന്റിയർമാരെ ശനിയാഴ്ച വാക്സിൻ പരീക്ഷണത്തിന് വിധേയമാക്കും.

ഇന്ത്യൻ കൗൺസിൽ ഒഫ് മെഡിക്കൽ റിസേർച്ചിന്റെ സഹകരണത്തോടെ ഭാരത് ബയോടെക് വികസിപ്പിച്ചെടുത്ത കൊവാക്സിന്റെ ക്ലിനിക്കൽ ട്രയലിൽ പങ്കെടുക്കാൻ സന്നദ്ധത അറിയിച്ച് രജിസ്റ്റർ ചെയ്തിരിക്കുന്നത് 3,500 ഓളം പേരാണ്.

ആരോഗ്യപൂർണരായ 100 പേരെ ഉൾപ്പെടുത്തിയാണ് എയിംസിൽ ആദ്യ ഘട്ട ട്രയൽ നടക്കുന്നത്. പത്ത് പേരിൽ ആദ്യം വാക്സിൻ പരീക്ഷണം നടത്തിയ ശേഷം ഇൻസ്റ്റിറ്റ്യൂട്ട് ഒഫ് എത്തിക്സ് കമ്മിറ്റി പരീഷണ റിപ്പോർട്ട് പരിശോധിച്ച് സുരക്ഷ ഉറപ്പുവരുത്തും. ശേഷം മറ്റുള്ളവരിലേക്കും വാക്സിനേഷൻ വ്യാപിപ്പിക്കും.

വാക്സിൻ ട്രയലിൽ പങ്കെടുക്കാൻ സന്നദ്ധതയറിയിച്ച വോളന്റിയർമാരെയെല്ലാം എയിംസിൽ നിരീക്ഷിച്ച് വരികയാണ്. ഡയബറ്റീസ്, ഉയർന്ന രക്തസമ്മർദ്ദം, ഹൃദയ സംബന്ധമായ രോഗങ്ങൾ, വൃക്ക - കരൾ രോഗങ്ങൾ തുടങ്ങിയവയുമായി ബന്ധപ്പെട്ട് 50 ഓളം വ്യത്യസ്ത പരിശോധനകൾക്ക് വിധേയമാക്കിയ ശേഷമാണ് പൂർണ ആരോഗ്യത്തോടെയുള്ള വോളന്റിയർമാരെ തിരഞ്ഞെടുത്തിരിക്കുന്നത്.

രാജ്യവ്യാപകമായി കൊവാക്സിന്റെ മനുഷ്യരിലുള്ള ക്ലിനിക്കൽ ട്രയലിന്റെ ഒന്നാം ഘട്ടം ആകെ 375 പേരിലാണ് നടക്കുക. രണ്ടാം ഘട്ടത്തിൽ 750 പേരിലാണ് പരീക്ഷണം. 18 മുതൽ 55 വരെ പ്രായമുള്ള യാതൊരു ആരോഗ്യപ്രശ്നവുമില്ലാത്തവരിലാണ് ആദ്യ ഘട്ട പരീക്ഷണം. 12 മുതൽ 65 വരെ പ്രായമുള്ളവരിലാണ് രണ്ടാം ഘട്ട പരീക്ഷണം.

ഡൽഹി ആസ്ഥാനമായി പ്രവർത്തിക്കുന്ന ഡോ. ഡാൻഗ്സ് ലാബും കൊവാക്സിന്റെ ക്ലിനിക്കൽ ട്രയലിനായി ഭാരത് ബയോടെകുമായി സഹകരിക്കുന്നുണ്ട്. കൊവാക്സിന്റെ സുരക്ഷാ പരിശോധനകൾ സംബന്ധിച്ച പഠനങ്ങൾ ഇവിടെയും നടക്കുന്നുണ്ട്. ഇന്ത്യയിൽ എയിംസ് ഉൾപ്പെടെ 12 സ്ഥാപനങ്ങളെയാണ് കൊവാക്സിന്റെ ക്ലിനിക്കൽ ട്രയൽ നടത്താൻ ഐ.സി.എം.ആർ തിരഞ്ഞെടുത്തിരിക്കുന്നത്.