മലയാളികളുടെ പ്രിയ താരം മോഹൻലാൽ നാലു മാസത്തെ ചെന്നൈ ജീവിതത്തിനു ശേഷം കേരളത്തിലേക്ക് തിരിച്ചെത്തി. റോഡ് മാർഗമാണ് ചെന്നൈയിൽ നിന്ന് താരം കൊച്ചിയിലെത്തിയത്. പതിനാല് ദിവസം കൊച്ചിയിലെ സ്വകാര്യ ഹോട്ടലിൽ നിരീക്ഷണത്തിൽ കഴിഞ്ഞ ശേഷമെ താരം തേവരയിലുളള വീട്ടിലേക്ക് പോകു.

മോഹൻലാൽ തന്റെ ഡ്രൈവർക്കൊപ്പമാണ് കാറിൽ ചെന്നൈയിൽ നിന്ന് യാത്ര തിരിച്ചത്. താരത്തിന്റെ വരവിന് മുമ്പായി തന്നെ ഇവിടെയുള്ള സഹായികൾ ഹോട്ടലിൽ എല്ലാ സൗകര്യങ്ങളും ഒരുക്കിയിരുന്നു.അമ്മയെ കാണുന്നതിനാണ് താരം കൊവിഡ് ഭീതിയ്ക്കിടയിലും ചെന്നൈയിൽ നിന്നും യാത്ര തിരിച്ചത്. ക്വാറന്റീൻ കാലാവധി പൂർത്തിയാക്കി അമ്മയ്ക്കൊപ്പം താമസിച്ച ശേഷം താരം ചെന്നൈയിലേക്ക് മടങ്ങിയേക്കും. ഭാര്യയ്ക്കും മകനുമൊപ്പം കഴിഞ്ഞ നാലു മാസങ്ങളായി ചെന്നൈയിലെ വീട്ടിലാണ് താരം താമസിച്ചിരുന്നത്. കൊവിഡിനെ തുടർന്ന് രാജ്യത്ത് ലോക്ക്ഡൗൺ പ്രഖ്യാപിച്ചതോടെ താരം ചെന്നൈയിൽ കുടുങ്ങി പോകുകയായിരുന്നു. കൊവിഡ് കേസുകൾ ഉയരുന്ന പശ്ചാത്തലത്തിൽ ദൃശ്യം രണ്ടാം ഭാഗത്തിന്റെ ചിത്രീകരണം സെപ്റ്റംബറിലാകും ആരംഭിക്കുക.