സൈബർ ആക്രമണത്തിനെതിരെ പ്രതികരിച്ചു കൊണ്ട് നടി അഹാന കൃഷ്ണ സോഷ്യൽ മീഡിയയിൽ പങ്കുവച്ച വീഡിയോ വൈറലായിരുന്നു. ഇതിന് പിന്നാലെ താരത്തെ പിന്തുണച്ചു കൊണ്ട് നിരവധി പ്രമുഖരും രംഗത്തെത്തിയിരുന്നു.ഇതിനൊപ്പം തന്നെ തിരുവനന്തപുരത്തെ ലോക്ഡൗൺ സംബന്ധിച്ചുളള താരത്തിന്റെ ഇൻസ്റ്റഗ്രാം സ്റ്റോറിയെ വിമർശിച്ചുകൊണ്ടും നിരവധി പേർ രംഗത്തെത്തി. ഇത്തരത്തിൽ കമന്റിട്ടയാളെ വിമർശിച്ചതിന്റെ പേരിൽ വെട്ടിലായിരിക്കുകയാണ് അഹാന കൃഷ്ണ.
കൊവിഡ് പ്രതിരോധത്തിനായി ഏവരും സാമൂഹിക അകലം പാലിക്കണമെന്ന് ആഹ്വാനം ചെയ്ത് നടി പങ്കുവച്ച വിഡിയോയ്ക്കു താഴെയാണ് മിസ്ഹാബ് മുസ്തഫ എന്നയാൾ കമന്റ് ചെയ്തത്. കമന്റിലെ സൈബർ ബുള്ളീയെന്ന ഭാഗം മാത്രം എടുത്ത് അഹാന രൂക്ഷഭാഷയിൽ ഇയാളെ വിമർശിക്കുകയും ചെയ്തു. ഇതിന് പിന്നാലെയാണ് തന്നെ ഒരു ‘സൈബർ ബുള്ളി’ ആയി അഹാന ഫോളോവ്ഴ്സിനു മുന്നിൽ അവതരിപ്പിച്ചെന്ന പരാതിയുമായി യുവാവ് രംഗത്തെത്തിയത്. ഇതിന് തെളിവായി ഇയാൾ തന്റെ കമന്റിന്റെ സ്ക്രീൻഷോട്ടുകളും സമൂഹമാദ്ധ്യത്തിൽ പങ്കുവച്ചു.
"കുറച്ച് ആഴ്ചകള്‍ക്ക് മുന്‍പ് നിങ്ങള്‍ ഇന്‍സ്റ്റഗ്രാമില്‍ എഴുതി ഗവണ്‍മെന്റ് കൊവിഡിനെ ഉപയോഗിച്ച് രാഷ്ട്രീയം കളിക്കുകയാണെന്ന്. സ്വര്‍ണ്ണക്കടത്ത് മറയ്ക്കാനാണ് ലോക്ക്ഡൗണ്‍ കൊണ്ടുവന്നതെന്ന്. ഇപ്പോൾ കൊവിഡ് വളരെ വേഗം പടരുന്നുവെന്നും സമൂഹവ്യാപനം ഉണ്ടാകുമെന്നും പറഞ്ഞ് അതേ ഗവണ്‍മെന്റിനു വേണ്ടി തന്നെ വീഡിയോ ചെയ്യുന്നു. സൈബർ ബുള്ളിയിങ്ങിനെതിരായ താങ്കളുടെ വിഡിയോ നല്ലതായിരുന്നു. താങ്കൾ അത്രയേറെ വിമർശിക്കപ്പെട്ടിരുന്നു. പക്ഷേ എന്റെ അഭിപ്രായത്തിൽ ലോക്ക്ഡൗൺ സംബന്ധിച്ചുള്ള താങ്കളുടെ തെറ്റായ വാദമാണ് അതിനു കാരണം. നിങ്ങളെപ്പോലുള്ള സെലിബ്രിറ്റികൾ എന്തെങ്കിലും പോസ്റ്റ് ചെയ്യുന്നതിന് മുൻപ് രണ്ടുവട്ടം ചിന്തിക്കണം. നിങ്ങളുടെ തെറ്റ് മറച്ചു പിടിക്കുന്നതിനു പകരം അത് എന്തു കൊണ്ട് അംഗീകരിച്ചു കൂട ?"- എന്നായിരുന്നു മിസ‌്ഹാബിന്റെ കമന്റ്.
ഈ കമന്റിന്റെ അവസാന ഭാഗം മാത്രം ചൂണ്ടിക്കാട്ടി അഹാന കുറിച്ചത് ഇങ്ങനെയാണ്. ‘ഫെയ്സ്ബുക്കിൽ ഒരാൾ ഇട്ട കമന്റാണ് ഇത്. ഈ സർ പറയുന്നത് ഞാൻ അക്രമിക്കപ്പെട്ടത് തെറ്റായ വാദം നടത്തിയതു കൊണ്ടാണെന്നാണ്. സർ പക്ഷേ ഞാൻ ഒരു കാര്യം ചോദിക്കട്ടെ താങ്കളുടെ ഈ വാദമെന്ന് പറയുന്നത് അവൾ ബലാൽസംഗം ചെയ്യപ്പെട്ടത് ഇറക്കം കുറഞ്ഞ വസ്ത്രം ധരിച്ചതു കൊണ്ടാണ് എന്നു പറയുന്നതു പോലെ തന്നെയല്ലേ ?‘ ഇതിന് പിന്നാലെയാണ് രൂക്ഷ വിമർശനവുമായി മിസ്ഹാബ് രംഗത്തെത്തിയത്. എന്തിനെയാണോ അവർ എതിർക്കുന്നത് അതുതന്നെയാണ് അവർ ചെയ്യുന്നതെന്നായിരുന്നു മിസ്താബിന്റെ മറുപടി.
"സൈബർ ബുള്ളിയിംഗിനെതിരായി പോരാടിയ അതേ ആൾ തന്നെ എന്റെ കമന്റ് എടുത്ത് പകുതി ഭാഗം ഡിലീറ്റ് ചെയ്ത് അവരുടെ 19 ലക്ഷം ഫോളോവേഴ്സിനു മുന്നിൽ എന്നെ ഒരു ‘ബുള്ളി’ ആക്കി അവതരിപ്പിച്ചു. ഒരു നടി എന്ന നിലയിൽ ഫോളോവേഴ്സിൽ നിന്നുയരുന്ന ചോദ്യങ്ങൾ സ്വീകരിക്കാനുള്ള പക്വത അവർ കാണിക്കേണ്ടതാണ്. എന്റെ കമന്റിൽ ഞാൻ അവരെ ആക്രമിച്ചില്ലെന്നു മാത്രമല്ല ആക്രമിക്കുന്നവരെ ഒരു തരത്തിലും ന്യായീകരിച്ചതുമില്ല. എന്തിനെതിരെയാണോ അവർ പോരാടുന്നത് അതു തന്നെയാണ് അവർ എന്നോടും ചെയ്തത്." സോഷ്യൽ മീഡിയയിൽ വൈറലാവുകയാണ് മിസ്താബിന്റെ പോസ്റ്റ്.