നീണ്ട നാലുമാസത്തെ ചെന്നൈ ജീവിതത്തിനുശേഷം മലയാളികളുടെ പ്രിയതാരം മോഹൻലാൽ കേരളത്തിൽ തിരിച്ചെത്തി. ചെന്നൈ നഗരത്തിൽനിന്ന് റോഡ് മാർഗമാണ് താരം കൊച്ചിയിൽ എത്തിയത്. കൊച്ചിയിലെ സ്വകാര്യ ഹോട്ടലിൽ പതിനാലു ദിവസത്തേക്ക് ക്വാറന്റൈനിൽ പ്രവേശിച്ച താരം അതിനുശേഷമേ വീട്ടിലേക്ക് മടങ്ങൂ. തന്റെ ഡ്രൈവർക്കൊപ്പമാണ് താരം കാറിൽ ചെന്നൈയിൽനിന്ന് യാത്ര തിരിച്ചത്. മോഹൻലാലിന്റെ വരവിനു മുന്നോടിയായി ഇവിടെയുള്ള സഹായികൾ ഹോട്ടലിൽ എല്ലാ സൗകര്യങ്ങളും ഒരുക്കിയിരുന്നു. തേവരയിലെ വീട്ടിൽ കഴിയുന്ന അമ്മയെ കാണുന്നതിനാണ് താരം കോവിഡ് ഭീതി നിലനിൽക്കുന്ന സമയത്തും യാത്രയ്ക്ക് മുതിർന്നത്. ക്വാറന്റൈൻ കാലാവധി പൂർത്തിയാക്കി അമ്മയ്ക്കൊപ്പം കുറച്ചു ദിവസങ്ങൾ ചിലവഴിച്ച താരം ചെന്നൈയിലേക്ക് മടങ്ങിയേക്കും. കഴിഞ്ഞ നാലു മാസങ്ങളായി ചെന്നൈയിലെ വീട്ടിൽ ഭാര്യയ്ക്കും മകനുമൊപ്പമായിരുന്നു താരത്തിന്റെ താമസം. കോവിഡ് കണക്കുകൾ ഉയർന്നതോടെ രാജ്യത്ത് ലോക് ഡൗൺ പ്രഖ്യാപിക്കുകയും താരം ചെന്നൈയിൽ കുടുങ്ങിപോവുകയുമായിരുന്നു.