ബീജിംഗ്: ചൈനീസ് തലസ്ഥാനമായ ബീജിംഗിൽ കൊവിഡ് വ്യാപനത്തെത്തുടർന്ന് അടച്ചുപൂട്ടിയ സിനിമ തിയേറ്ററുകൾ ഭാഗികമായി തുറന്നു. ഇന്നലെയാണ് തിയേറ്ററുകൾ തുറന്നത്. അഡ്വാൻസ് ബുക്കിംഗ് നിർബന്ധമാണ്. തിയേറ്ററിനകത്ത് ഭക്ഷണവും വെള്ളവും അനുവദിക്കില്ല. താപനില പരിശോധിക്കണം. ട്രാവൽ ഹിസ്റ്ററി സംബന്ധിച്ച വിവരങ്ങൾ നൽകണം. ശാരീരിക അകലം പാലിക്കണം. ജനുവരിയിലാണ് ചൈനയിലെ സിനിമാ തിയേറ്ററുകൾ അടച്ചുപൂട്ടിയത്. പ്രധാന ചൈനീസ് നഗരങ്ങളിലെല്ലാം തിയേറ്ററുകൾ തുറക്കാൻ തുടങ്ങിയിട്ടുണ്ട്. വെള്ളിയാഴ്ച 21 പുതിയ കേസുകളാണ് സ്ഥിരീകരിച്ചത്. സമ്പർക്കത്തിലൂടെയുള്ള കേസുകളൊന്നും ബീജിംഗിൽ രണ്ടാഴ്ചയിലധികമായി റിപ്പോർട്ട് ചെയ്തിട്ടില്ല.