സംഗീത സംവിധായകനായ കൈലാസ് മേനോൻ ലോക്ക്ഡൗൺ കാലം കൊച്ചിയിലുള്ള വീട്ടിൽ കുടുംബത്തിനൊപ്പമായിരുന്നു. സോഷ്യൽ മീഡിയ പേജുകളിൽ ആക്ടീവായ താരം പങ്കുവച്ച പുതിയ ഫോട്ടോസാണ് ഇപ്പോൾ തരംഗമാവുന്നത്. ഭാര്യ അന്നപൂർണ്ണ പിള്ളയ്‌ക്കൊപ്പമുള്ള ചില ചിത്രങ്ങളായിരുന്നു താരം പോസ്റ്റ് ചെയ്തിരുന്നത്. നിറവയറുമായി ഇരിക്കുന്ന ഭാര്യയുടെ വയറിൽ ലവ് ഇമോജി ഉണ്ടാക്കിയിരിക്കുകയാണ്. ഒരു മാസം കൂടിയേ ഉള്ളു കുഞ്ഞതിഥി വരാൻ എന്ന് കൂടി സൂചിപ്പിച്ച് കൊണ്ടാണ് ഈ ചിത്രങ്ങൾ പോസ്റ്റ് ചെയ്തിരിക്കുന്നത്.

മെറ്റേണിറ്റി ഫോട്ടോഷൂട്ടിന്റെ ഭാഗമായി എടുത്ത ഫോട്ടോസാണെന്നാണ് കരുതുന്നത്. ജ്യോത്സന, വീണ നായർ, നിരഞ്ജൻ മണിയൻപിള്ളരാജു, സാന്ദ്ര തോമസ്, പ്രിയ പ്രകാശ് വാര്യർ, അഹാന കൃഷ്ണ, രജിഷ വിജയൻ, സ്വാസിക വിജയ്, സിത്താര കൃഷ്ണകുമാർ, തുടങ്ങി സിനിമ, സംഗീത ലോകത്ത് നിന്നുള്ള ഒരുപാട് താരങ്ങളാണ് കൈലാസ് മേനോനും ഭാര്യയ്ക്കും ആശംസകളുമായി എത്തിയിരിക്കുന്നത്. താരത്തിന്റെ പോസ്റ്റിന് താഴെ എല്ലാവരും കമന്റുകളും ഇട്ടിട്ടുണ്ട്. ലോക്ക്ഡൗൺ കാലം വീട്ടിൽ തന്നെയായിരുന്നു എന്ന് കൈലാസ് മേനോൻ നേരത്തെ പറഞ്ഞിരുന്നു.

തിരക്കുകളിൽ നിന്നും മാറി നിൽക്കുന്നതിനാൽ വീട്ടുകാർക്കൊപ്പം പതിവിലും കൂടുതൽ സമയം ചെലവഴിക്കുന്നുണ്ട്. കൂടുതൽ കാര്യങ്ങൾ പഠിക്കാനും ചിന്തിക്കാനും പരീക്ഷിക്കാനുമുള്ള അവസരമായിട്ടാണ് ഈ ദിവസങ്ങളെ കരുതുന്നതെന്നാണ് കൈലാസ് പറയുന്നത്. ഇപ്പോൾ അധികം ഫോൺ വിളികൾ വരാറില്ലെന്നും ധാരാളം ഒഴിവ് സമയം ഉള്ളതിനാൽ വ്യക്തിപരമായ ജീവിതത്തിന് വേണ്ടി സമയം മാറ്റിവയ്ക്കാൻ സാധിക്കുന്നുവെന്നും മൂന്നോ നാലോ മാസം കൂടുമ്പോൾ ഒരാഴ്ചത്തേക്കെങ്കിലും ഒരു ബ്രേക്ക് എടുക്കണം എന്ന തിരിച്ചറിവ് നൽകിയത് ഈ ലോക്ഡൗൺ ആണെന്നും കൈലാസ് സൂചിപ്പിക്കുന്നു. "മനസ് ഇപ്പോൾ വളരെ ശാന്തമാണ്. വലിയ ടെൻഷനൊന്നും ഇല്ല. ശാന്തവും സ്വസ്ഥവുമായിരുന്ന് ചിന്തിക്കാനും പഠിക്കാനും സാധിക്കുന്നു." - കൈലാസ് മേനോൻ