വാഷിംഗ്ടൺ: പ്രസിഡന്റ് തിരഞ്ഞെടുപ്പിന്​ 100 ദിനം മാത്രം ശേഷിക്കേ പ്രസിഡന്റും റിപ്പബ്ലിക്കൻ പാർട്ടി സ്ഥാനാർഥിയുമായ ഡോണൾഡ്​ ട്രംപി​​ന്റെ ജനപ്രീതി ഇടിയുന്നതായി റിപ്പോർട്ട്. സമീപകാലത്ത്​ നടന്ന സർവേകളി​ലെല്ലാം ട്രംപ്, ബൈഡനെക്കാൾ ഏറെ പിന്നിലായിരുന്നു. കഴിഞ്ഞ ദിവസത്തെ അസോസിയേറ്റഡ്​ പ്രസ്​- എൻ.ഒ.ആർ.സി സെന്റർ ഫോർ പബ്ലിക്​ അഫയേഴ്​സ്​ റിസർച് സർവേയും ട്രംപിന്​ തിരിച്ചടിയാണ്​.

കൊവിഡിനെ നേരിടുന്ന ​ട്രംപി​​ന്റെ രീതിയെ 32 ശതമാനം പേർ മാത്രമേ അംഗീകരിക്കുന്നുള്ളൂ. പത്തിൽ എട്ട്​ അമേരിക്കക്കാരും ട്രംപ്​ രാജ്യത്തെ തെറ്റായ ദിശയിലേക്കാണ്​ നയിക്കുന്നതെന്ന്​ വിശ്വസിക്കുന്നു. ജനുവരിയിൽ ദേശീയ സമ്പദ്​വ്യവസ്​ഥ മികച്ച നിലയിലാണെന്ന്​ 67 ശതമാനം അമേരിക്കക്കാർ വിശ്വസിച്ചിരുന്നെങ്കിൽ ഇപ്പോൾ ഇത്​ 38 ശതമാനം മാത്രമാണ്​. പ്രസിഡ​ന്റെന്ന നിലയിൽ ട്രംപി​ന്റെ പ്രകടനം മെച്ചപ്പെട്ടതാണെന്ന്​ വിശ്വസിക്കുന്നവരും 38 ശതമാനം മാത്രമാണ്​.

അതേസമയം,​ ട്രംപി​നെതിരെയുള്ള ​പൊതുവികാരം മുൻ വൈസ്​ പ്രസിഡന്റും ഡെമോക്രാറ്റിക്​ പാർട്ടി സ്ഥാനാർഥിയുമായ ജോ ബൈഡന്​ അനുകൂലമായി​. സമീപകാല സർവേകളിലെല്ലാം ട്രംപിനേക്കാൾ പത്ത്​ശതമാനം പിന്തുണ കൂടുതൽ ബൈഡനായിരുന്നു. ഇനിയുള്ള 100 ദിനങ്ങളിൽ കൊവിഡിനെ നേരിടുന്നതും സമ്പദ്​വ്യവസ്ഥ ചലിപ്പിക്കുന്നതുമായിരിക്കും അടുത്ത പ്രസിഡന്റിനെ തീരുമാനിക്കുക. ഈ വർഷം നവംബർ മൂന്നിനാണ് പ്രസിഡന്റ് തിരഞ്ഞെടുപ്പ്.

തിരിച്ചടികൾ

♦ കൊവിഡ്​ മഹാമാരിയെ നേരിടൽ

♦ സമ്പദ്​വ്യവസ്​ഥയുടെ തളർച്ച

♦ വർദ്ധിക്കുന്ന തൊഴിലില്ലായ്​മ

♦ വംശീയ,​ ന്യൂനപക്ഷ വെറി

♦ രാജ്യത്തെ പ്രക്ഷോഭങ്ങൾ