മുംബയ്: കഴിഞ്ഞ സാമ്പത്തിക വർഷം (2019-20)​ ഇന്ത്യയിലെ ബാങ്കുകളിലും തിരഞ്ഞെടുക്കപ്പെട്ട ധനകാര്യ സ്ഥാപനങ്ങളിലുമായി നടന്നത് 1.85 ലക്ഷം കോടി രൂപ മതിക്കുന്ന 84,​545 തട്ടിപ്പുകളെന്ന് വിവരാവകാശ പ്രകാരം റിസർവ് ബാങ്ക് പുറത്തുവിട്ട റിപ്പോർട്ട് വ്യക്തമാക്കി. അഭയ് കോലാർകർ എന്ന വിവരാവകാശ പ്രവർത്തകനാണ് റിപ്പോർട്ട് തേടിയത്. ബാങ്കിംഗ് ജീവനക്കാരും തട്ടിപ്പിലുൾപ്പെട്ടിട്ടുണ്ടോ എന്ന് അദ്ദേഹം ചോദിച്ചിരുന്നു.

ബാങ്ക് ജീവനക്കാർ ഉൾപ്പെട്ട 2,​668 കേസുകൾ കഴിഞ്ഞവർഷം രേഖപ്പെടുത്തിയിട്ടുണ്ട്. മൂല്യം 1,​783.22 കോടി രൂപയാണ്. കഴിഞ്ഞവർഷം ജൂലായ് ഒന്നുമുതൽ മാർച്ച് 31വരെ 2.14 ലക്ഷം പരാതികളും ലഭിച്ചു. എസ്.ബി.ഐയിലാണ് ഏറ്റവുമധികം പരാതികൾ; 63,​259 എണ്ണം. എച്ച്.ഡി.എഫ്.സി ബാങ്ക് (18,​764)​,​ ഐ.സി.ഐ.സി.ഐ ബാങ്ക് (14,​582)​,​ പഞ്ചാബ് നാഷണൽ ബാങ്ക് (12,​469)​,​ ആക്‌സിസ് ബാങ്ക് (12,​214)​ എന്നിവയാണ് കൂടുതൽ പരാതികൾ ലഭിച്ച മറ്ര് പ്രമുഖ ബാങ്കുകൾ.

അടച്ചുപൂട്ടിയ ശാഖകൾ

ലയനത്തിന്റെ ഭാഗമായി 2019-20ൽ 194 ബാങ്ക് ശാഖകൾ അടച്ചുപൂട്ടി. ഇതിൽ,​ 78 എണ്ണം എസ്.ബി.ഐയുടേതാണ്. മറ്റൊരു ശാഖയുമായി ലയിച്ച ശാഖകളുടെ എണ്ണം 438. എസ്.ബി.ഐയിൽ 130,​ സെൻട്രൽ ബാങ്ക് 62,​ അലഹബാദ് ബാങ്ക് 59 എന്നിവയാണ് ശാഖകൾ ലയിപ്പിച്ചവയിൽ മുൻപന്തിയിൽ.