കോയമ്പത്തൂർ: സ്ദഗുരു ജഗ്ഗി വാസുദേവിന്റെ നേതൃത്വത്തിൽ പ്രവർത്തിക്കുന്ന ആത്‌മീയ സാമൂഹിക നവോത്ഥാന പ്രസ്ഥാനമായ ഈശ ഫൗണ്ടേഷന് ഐക്യരാഷ്ട്ര സഭയുടെ ആദരം. സഭയുടെ പരിസ്ഥിതി സംഘടനയായ യുണൈറ്റഡ് നേഷൻസ് എൻവയോൺമെന്റ് പ്രോഗ്രാം(യു.എൻ.ഇ.പി) ഈശ ഫൗണ്ടേഷന് നിരീക്ഷക പദവി നൽകി. സംഘടനയുടെ യോഗമായ യു എന്നിന്റെ എൻവയോൺമെന്റ് അസംബ്ളി (യു.എൻ.ഇ.എ)യിലും മറ്റ് ഉപ സംഘടനകളിലും ഇനി മുതൽ ഈശ ഫൗണ്ടേഷന് നിരീക്ഷക പദവി ലഭിക്കും. ഐക്യരാഷ്ട്ര സഭയുടെ സംഘടനകളിൽ അംഗങ്ങളല്ലാത്തവർക്കും സംഘടനയുടെ വിവിധ സംരംഭങ്ങളിൽ പങ്കെടുക്കാൻ നിരീക്ഷക പദവിയിലൂടെ സാധിക്കും.
ആഗോള സംഘടന യോഗങ്ങളിൽ പങ്കെടുക്കാനും സർക്കാർ പ്രതിനിധികളുമായി ചർച്ചകൾ നടത്താനും സംഘടനയുടെ നയ രൂപീകരണത്തിനും നിരീക്ഷക പദവി ലഭിക്കുന്നതിലൂടെ ഈശ ഫൗണ്ടേഷന് സാധിക്കും. 2018ൽ ലോക പരിസ്ഥിതി ദിനം പ്രമാണിച്ച് ഇന്ത്യ ആതിഥ്യമരുളിയ യു.എൻ.ഇ.പിയുടെ ചടങ്ങിൽ ഈശ പങ്കാളിയായിരുന്നു. ഭൂമിയുടെ ജൈവികത തകർക്കപ്പെടുന്നതിനെതിരെ പൊരുതുന്ന ഐക്യരാഷ്ട്ര സഭയുടെ സംരംഭമായ യുണൈറ്റഡ് നേഷൻസ് ടു കോംബാറ്റ് ഡെസേർട്ടിഫിക്കേഷനിലും(യുഎൻസിസിഡി) കഴിഞ്ഞ വർഷം ഈശ പങ്കാളിയായി.
രാജ്യത്തെ നദികളുടെ ക്ഷേമത്തിനായുള‌ള റാലി ഫോർ റിവേഴ്‌സ് ക്യാമ്പെയിൻ ഈശ ആരംഭിച്ചതോടെ ഐക്യരാഷ്ട്ര സഭയുടെ ഘടകങ്ങളായ യുണൈറ്റഡ് നേഷൻസ് വാട്ടേഴ്സ്, യുഎൻസിസിഡി, യുനെസ്‌കോ എന്നിവ ഈശ ഫൗണ്ടേഷൻ സ്ഥാപകനായ സദ്‌ഗുരു ജഗ്ഗി വാസുദേവിനെ ക്ഷണിച്ചിരുന്നു. 2007 മുതൽ ഐക്യരാഷ്ട്ര സഭയുടെ സാമൂഹിക സാമ്പത്തിക കൗൺസിലിൽ പ്രത്യേക വിദഗ്‌ധോപദേശക പദവിയും ഈശ ഫൗണ്ടേഷന് ഉണ്ട്.