ദുല്‍ഖര്‍ സല്‍മാന്റെ നിര്‍മാണത്തില്‍ നവാഗതനായ ഷംസു സയ്ബ സംവിധാനം ചെയ്യുന്ന 'മണിയറയിലെ അശോകന്‍' എന്ന പുതിയ ചിത്രത്തിലെ ഗാനം പുറത്ത്. 'മൊഞ്ചത്തി പെണ്ണേ ഉണ്ണിമായേ' എന്ന് തുടങ്ങുന്ന ഗാനം ദുല്‍ഖറും നടന്‍ ജേക്കബ് ഗ്രിഗറിയും ചേര്‍ന്നാണ് പാടിയിരിക്കുന്നത്. ശ്രീഹരി കെ.നായരാണ് സംഗീതം. ഷിഹാസ് അമ്മദ്‌കോയയുടെതാണ് വരികള്‍.
നാട്ടിന്‍പുറത്തുകാരനായ അശോകന്റെ പ്രണയവും വിവാഹവുമാണ് ചിത്രത്തിന്റെ ഇതിവൃത്തം. ജേക്കബ് ഗ്രിഗറിക്ക് പുറമെ ഷൈന്‍ ടോം ചാക്കോ, കൃഷ്ണ ശങ്കര്‍ വിജയരാഘവന്‍, ഇന്ദ്രന്‍സ്, സുധീഷ്, ശ്രീലക്ഷ്മി, നയന, ശ്രിത ശിവദാസ് തുടങ്ങി വലിയ താരനിര ചിത്രത്തിന്റെ ഭാഗമായുണ്ട്. അനുപമ പരമേശ്വരനാണ് നായിക. ശ്യാമ എന്ന കഥാപാത്രത്തെയാണ് ചിത്രത്തില്‍ അനുപമ അവതരിപ്പിക്കുന്നത്. വേ ഫെയറര്‍ ഫിലിംസിന്റെ ബാനറില്‍ ദുല്‍ഖര്‍ നിര്‍മ്മിക്കുന്ന ചിത്രത്തില്‍ ജേക്കബ് ഗ്രിഗറിയാണ് നായകന്‍. തിരക്കഥ-വിനീത് കൃഷ്ണന്‍, ഛായാഗ്രഹണം- സജാദ് കാക്കു, എഡിറ്റിങ് -അപ്പു ഭട്ടതിരി, സംഗീതം- ശ്രീഹരി കെ നായര്‍. അരുണ്‍ എസ് മണി, വിഷ്ണു പിസി എന്നിവര്‍ സൗണ്ട് ഡിസൈന്‍ നിര്‍വഹിച്ചിരിക്കുന്ന ചിത്രത്തില്‍ ജയന്‍ ക്രയോണ്‍ ആണ് പ്രൊഡക്ഷന്‍ ഡിസൈനര്‍.