ന്യൂഡൽഹി: രാജ്യത്തെ ഏറ്റവും വലിയ വാഹന നിർമ്മാണ കമ്പനിയായ മാരുതി സുസുക്കി നടപ്പുവർഷത്തെ ആദ്യപാദമായ ഏപ്രിൽ-ജൂണിൽ 268.3 കോടി രൂപയുടെ സഞ്ചിതനഷ്‌ടം നേരിട്ടു. കൊവിഡും ലോക്ക്ഡൗണും മൂലം ഉത്‌പാദനവും വില്പനയും നിലച്ചതാണ് മാരുതിക്ക് തിരിച്ചടിയായത്. മുൻവർഷത്തെ സമാനപാദത്തിൽ 1,​376.8 കോടി രൂപയുടെ ലാഭം മാരുതി നേടിയിരുന്നു.

17 വർഷത്തിനിടെ ആദ്യമായാണ് ഒരു പാദത്തിൽ മാരുതി നഷ്‌ടം കുറിക്കുന്നത്. വരുമാനം 19,​273.2 കോടി രൂപയിൽ നിന്ന് 78.67 ശതമാനം ഇടിഞ്ഞ് 4,​110.6 കോടി രൂപയായി. 2019 ഏപ്രിൽ-ജൂണിൽ 4.02 ലക്ഷം വാഹനങ്ങൾ വിറ്റഴിച്ച മാരുതി സുസുക്കി,​ ഈവർഷം സമാനപാദത്തിൽ വിറ്റത് 81 ശതമാനം നഷ്‌ടത്തോടെ 76,​599 വാഹനങ്ങളാണ്. ആഭ്യന്തര വില്പനയിൽ 82 ശതമാനവും കയറ്രുമതിയിൽ 66 ശതമാനവും നഷ്ടമുണ്ടായി.