ചെന്നൈ: 36 വർഷത്തോളം കാടിനെയും നാടിനെയും ഒരുപോലെ വിറപ്പിച്ച വീരപ്പന്റെ ജീവിതവും ഏറ്റുമുട്ടൽ കൊലപാതകവും വെബ് സീരീസ് രൂപത്തിൽ വരുന്നു. പ്രശസ്ത സിനിമാ നിർമ്മാണ കമ്പനിയായ ഇ ഫോർ എന്റർടെയിൻമെന്റ് നിർമിക്കുന്ന വെബ് സീരീസ് ഐ.പി.എസ് ഓഫീസർ വിജയകുമാർ എഴുതിയ ‘Chasing The Brigand’(ചേസിംഗ് ദ ബ്രിഗണ്ട്) എന്ന പുസ്തകത്തിനെ ആസ്പദമാക്കിയാണ് ഒരുക്കുന്നത്.

വീരപ്പനെ പിടിക്കുന്നതിനു വേണ്ടിയുള്ള സ്‌പെഷ്യൽ ടാസ്‌ക് ഫോഴ്‌സിന് നേതൃത്വം നൽകിയത് ഐ.പി.എസ് ഓഫീസറായ വിജയകുമാറായിരുന്നു. ഈ ഓപ്പറേഷനെ കുറിച്ചാണ് ബുക്കിൽ വിവരിച്ചിരിക്കുന്നത്. ലോക്ക്ഡൗൺ നിയന്ത്രണങ്ങളും പുറത്തുള്ള ഷൂട്ടിംഗിനുള്ള നിയന്ത്രണങ്ങളും അവസാനിക്കുന്നതോടെ വെബ് സീരീസിന്റെ നിർമാണം ആരംഭിക്കും. അതേസമയം, പുസ്തകത്തെ അധികരിച്ചോ, കഥാപാത്രങ്ങളോ, ആഖ്യാനമോ പശ്ചാത്തലമാക്കി സിനിമ, സീരീസ് എന്നിവ പുറത്തിറക്കിയാൽ നിയമപരമായി നേരിടുമെന്നും മുഴുവൻ അവകാശവും തങ്ങൾക്കായിരിക്കുമെന്നും ഇ ഫോർ എന്റർടെയിൻമെന്റ് പത്ര കുറിപ്പിലൂടെ അറിയിച്ചു.