ചെന്നൈ: കൊവിഡ്​ ലോക്ക്​ഡൗൺ നിയന്ത്രണങ്ങൾ ലംഘിച്ചും ഇ-പാസ്​ എടുക്കാതെയും കൊടൈക്കനാലിലെത്തിയ തമിഴ്​ സിനിമ നടൻമാർക്കെതിരെ പകർച്ചവ്യാധി നിയമ പ്രകാരം കേസ്. സൂരി, വിമൽ എന്നിവർക്കെതിരെയാണ് കൊടൈക്കനാൽ പൊലീസ്​ കേസ്​ രജിസ്​റ്റർ ചെയ്​തത്. തമിഴ്​നാട്ടിൽ നിലവിൽ അന്തർ ജില്ല യാത്രയ്ക്ക്​ ഇ-പാസ്​ നിർബന്ധമാണ്​. ഈ സാഹചര്യത്തിൽ ജൂലായ് 18നാണ്​ തിരുച്ചിയിൽനിന്ന്​ വിമലും മധുരയിൽനിന്ന്​ സൂരിയും ഡിണ്ടുഗൽ ജില്ലയിലെ കൊടൈക്കനാലിൽ എത്തിയത്​. മൂന്നുമാസക്കാലമായി കൊടൈക്കനാലിലെ ടൂറിസ്​റ്റ്​ കേന്ദ്രങ്ങൾ അടച്ചിട്ടിരിക്കയാണ്​. കൊടൈക്കനാലിലെ സംരക്ഷിത വനമേഖലയിൽ സ്​ഥിതി ചെയ്യുന്ന ബെറിജാം തടാകത്തിൽ സംഘം മിൻപിടുത്തത്തിലുമേർപ്പെട്ടു. ചില വനം അധികൃതരുടെയും പ്രദേശവാസികളുടെയും സഹായത്തോടെയാണ്​ ഇവർ വനഭാഗത്തേക്ക്​ പ്രവേശിച്ചത്​. വനം വകുപ്പി​ന്റെ ഗസ്​റ്റ്​ഹൗസിലായിരുന്നു താമസം​. സംഭവം വിവാദമായതോടെ സംഘാംഗങ്ങളിൽനിന്ന്​ ഫോറസ്​റ്റ് അധികൃതർ 2,000 രൂപ വീതം പിഴ ഈടാക്കി. വകുപ്പുതല അന്വേഷണത്തിനും ഉന്നത വനം ഉദ്യോഗസ്​ഥർ ഉത്തരവിട്ടു.