മുംബയ്: മഹാരാഷ്ട്രയിൽ കൊവിഡ് ബാധിച്ച് മൂന്ന് മലയാളികൾ കൂടി മരിച്ചു. ആലപ്പുഴ, ഇരിങ്ങാലക്കുട, വയനാട് സ്വദേശികളാണ് മരിച്ചത്. വയനാട് സ്വദേശി പ്രസാദ് (39) മഹാരാഷ്ട്രയിലെ പൂനയിലാണ് മരിച്ചത്. കണിയാരം തോമ്പ്രകുടി ബാലസുബ്രമണ്യന്റെ മകൻ ആണ് പ്രസാദ്. കുടുംബസമേതം പൂനയിൽ താമസിച്ച് വരികയായിരുന്നു ഇയാൾ. സ്പെയർ പാർട്സ് കട നടത്തുകയായിരുന്ന പ്രസാദിന് പത്ത് ദിവസം മുമ്പാണ് രോഗം ബാധിച്ചത്. സംസ്കാരം പൂനയിൽ തന്നെ നടത്തുമെന്ന് ബന്ധുക്കൾ അറിയിച്ചു.

ആലപ്പുഴ ചെന്നിത്തല സ്വദേശി ബാബു ഡേവിഡാണ് മരിച്ച മറ്റൊരാൾ. ഇരിങ്ങാലക്കുട സ്വദേശി കെ.കെ ജോർജ് ഡോംബിവാലിയിലാണ് മരിച്ചത്. ഇവർ രണ്ടു പേരും ഒരാഴ്ചയായി കൊവിഡ് ബാധിതരായി ചികിത്സയിലായിരുന്നു.

അതേസമയം സംസ്ഥാനത്ത് ഇന്ന് മൂന്ന് പേരാണ് കൊവിഡ് ബാധിച്ച് മരിച്ചത്. കൊല്ലത്തും കോഴിക്കോടുമാണ് കൊവിഡ് മരണങ്ങൾ റിപ്പോർട്ട് ചെയ്‌തത്. കോഴിക്കോട് ജില്ലയിൽ രണ്ട് പേരാണ് കൊവിഡ് ബാധിച്ച് മരിച്ചത്.