ബംഗളൂരു: ബംഗളൂരുവിൽ കോളേജ് വിദ്യാർത്ഥികളുടെ ചിത്രങ്ങൾ അശ്ലീല വെബ്സൈറ്റിൽ പ്രചരിപ്പിച്ച സംഭവത്തിൽ രണ്ടുപേർ അറസ്റ്റിൽ. ടെക്കികളായ അജയ് തനികാചലം(27) വികാസ് രഗോഥം(27) എന്നിവരെയാണ് സിറ്റി ക്രൈംബ്രാഞ്ചിന്റെ സൈബർ വിംഗ് അറസ്റ്റ് ചെയ്തത്. പെൺകുട്ടികളുടെയും അദ്ധ്യാപികമാരുടെയും ചിത്രങ്ങൾ അശ്ലീല വെബ്സൈറ്റിൽ നിന്ന് നീക്കം ചെയ്തതായും പൊലീസ് അറിയിച്ചു.

രണ്ട് ടെക്കികളും ചേർന്ന് മുപ്പതിലേറെ വിദ്യാർത്ഥികളുടെ ചിത്രങ്ങൾ പ്രചരിപ്പിച്ചതായി പൊലീസ് കണ്ടെത്തി. തുടർന്ന് വിശദമായ അന്വേഷണത്തിനൊടുവിൽ പ്രതികളെ പിടികൂടുകയായിരുന്നു. ഇവരുടെ ലാപ്ടോപ്പുകളും മൊബൈൽ ഫോണുകളും പൊലീസ് പിടിച്ചെടുത്തിട്ടുണ്ട്. ചിത്രങ്ങൾ അശ്ലീല വെബ്സൈറ്റിൽ പ്രചരിപ്പിച്ച സംഭവത്തിൽ വിദ്യാർത്ഥി കൂട്ടായ്മകളും രക്ഷിതാക്കളും ശക്തമായ പ്രതിഷേധം ഉയർത്തിയിരുന്നു.

ബംഗളൂരുവിലെ കോളേജ് വിദ്യാർത്ഥികളുടെയും അദ്ധ്യാപികമാരുടെയും സാമൂഹികമാദ്ധ്യമങ്ങളിലെ ചിത്രങ്ങൾ ദുരുപയോഗം ചെയ്തായിരുന്നു അശ്ലീല വെബ്സൈറ്റിൽ പോസ്റ്റ് ചെയ്തിരുന്നത്. സംഭവം ശ്രദ്ധയിൽപ്പെട്ടതോടെ വിദ്യാർത്ഥികളും കോളേജ് അധികൃതരും പൊലീസിൽ പരാതി നൽകുകയായിരുന്നു.